കൊച്ചി: കഞ്ചാവ് കേസിൽ അറസ്റ്റിലായ റാപ്പർ വേടൻ എന്നറിയപ്പെടുന്ന ഹിരൺ ദാസ് മുരളിക്കെതിരെ ആയുധ നിയമപ്രകാരവും പൊലീസ് കേസെടുക്കുന്നു. വേടന്റെ കൈവശം നിന്ന് പ്രത്യേക തരം കത്തി, മഴു തുടങ്ങിയ ആയുധങ്ങൾ പിടിച്ചെടുത്തതായി പൊലീസ് വ്യക്തമാക്കി. ഇതിന്റെ അടിസ്ഥാനത്തിൽ ആയുധ നിരോധന നിയമം ചുമത്തുന്നത് പരിഗണിക്കുകയാണ്. എന്നാൽ, ഇവ ആയുധങ്ങളല്ലെന്നും കലാപരിപാടികളിൽ ലഭിച്ച സമ്മാനങ്ങളാണെന്നുമാണ് വേടൻ പൊലീസിനോട് വിശദീകരിച്ചത്.

തൃക്കാക്കര എസിപി പിവി ബേബി പറഞ്ഞതനുസരിച്ച്, കൈവശം വയ്ക്കാൻ പാടില്ലാത്ത ആയുധങ്ങളാണ് വേടനിൽ നിന്ന് കണ്ടെടുത്തത്. വേടനെ ഇന്ന് വനംവകുപ്പിന് കൈമാറില്ലെന്നും അദ്ദേഹം അറിയിച്ചു. വൈദ്യപരിശോധനയ്ക്കായി തൃപ്പൂണിത്തുറ താലൂക്ക് ആശുപത്രിയിൽ എത്തിച്ചപ്പോൾ, നിയമപരമായി നേരിടുമെന്നും വിശദമായി പിന്നീട് സംസാരിക്കാമെന്നും വേടൻ മാധ്യമങ്ങളോട് പ്രതികരിച്ചു. പൊലീസിന്റെ വേട്ടയാടലാണോ എന്ന ചോദ്യത്തിന് "അല്ല" എന്നായിരുന്നു അദ്ദേഹത്തിന്റെ മറുപടി. തുടർന്ന് വേടനെ തൃപ്പൂണിത്തുറ ഹിൽപാലസ് പൊലീസ് സ്റ്റേഷനിലേക്ക് കൊണ്ടുപോയി.

കഞ്ചാവ് കേസിന് പിന്നാലെ വേടന്റെ കൈവശം നിന്ന് കണ്ടെടുത്ത മാലയിലെ പുലിപ്പല്ല് വനംവകുപ്പിന്റെ ശ്രദ്ധയിൽപ്പെട്ടു. ഇത് പുലിപ്പല്ലാണെന്ന് വനംവകുപ്പ് സ്ഥിരീകരിച്ചതോടെ, ഇതുമായി ബന്ധപ്പെട്ട് വേടനെതിരെ കേസെടുക്കാൻ തീരുമാനിച്ചു. എന്നാൽ, കഞ്ചാവ് കേസിലെ നടപടികൾ പൂർത്തിയാക്കിയ ശേഷമേ വനംവകുപ്പ് വേടനെ കസ്റ്റഡിയിൽ എടുക്കൂ. തുടർന്ന് അദ്ദേഹത്തെ കോടനാട് വനംവകുപ്പ് ഓഫീസിലേക്ക് കൊണ്ടുപോകും. പുലിപ്പല്ല് കേസിൽ അറസ്റ്റ് രേഖപ്പെടുത്തി വേടനെ കോടതിയിൽ ഹാജരാക്കുമെന്നും വനംവകുപ്പ് ഉദ്യോഗസ്ഥർ അറിയിച്ചു.

പിടിച്ചെടുത്ത പുലിപ്പല്ല് ഹിൽപാലസ് പൊലീസ് സ്റ്റേഷനിൽ എത്തിച്ചിട്ടുണ്ട്. ഇതുസംബന്ധിച്ച് വനംവകുപ്പിന് റിപ്പോർട്ട് നൽകുമെന്ന് പൊലീസ് വ്യക്തമാക്കി.