മലപ്പുറം: മലപ്പുറത്ത് തെരുവുനായയുടെ കടിയേറ്റതിനെ തുടര്‍ന്ന് പേ വിഷബാധയുണ്ടായി കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിഞ്ഞുവരികയായിരുന്ന അഞ്ചര വയസ്സുകാരി മരിച്ചു. തേഞ്ഞിപ്പലം പെരുവള്ളൂര്‍ സ്വദേശി സല്‍മാന്‍ ഫാരിസിന്റെ സിയ ഫാരിസ് (5) ആണ് മരിച്ചത്. 

മാര്‍ച്ച് 29 നാണ് അഞ്ചു വയസുകാരിക്ക് നായയുടെ കടിയേറ്റത്. അതേ ദിവസം തന്നെ രണ്ടര വയസായ മറ്റൊരു കുഞ്ഞിനുള്‍പ്പെടെ ഏഴ് പേര്‍ക്ക് കടിയേറ്റിരുന്നു. എന്നാല്‍ ഇപ്പോള്‍ പേവിഷബാധ സ്ഥിരീകരിച്ച കുട്ടിക്ക് തലയ്ക്കും കടിയേറ്റിരുന്നു. കൂടാതെ കാലിനും തലക്കും ആഴത്തിലുള്ള മുറിവേറ്റിട്ടും വിദഗ്ധ പരിശോധന നടത്താതെ കോഴിക്കോട് മെഡിക്കല്‍ കോളേജ് ആശുപത്രിയില്‍ നിന്നും പ്രാഥമിക ചികിത്സ നല്‍കി പറഞ്ഞു വിടുകയായിരുന്നുവെന്നാണ് നാട്ടുകാര്‍ പറയുന്നത്.

പിന്നാലെ പ്രതിരോധ കുത്തിവെപ്പുകളും കൃത്യമായി എടുത്തിട്ടും കുഞ്ഞിന് പേവിഷബാധയേറ്റത് ആരോഗ്യ വികുപ്പിന്റെ വീഴ്ചാണെന്ന പരാതിയാണ് ഉയരുന്നുത്. മുറിവുകളെല്ലാം ഉണങ്ങിയിരുന്നെങ്കിലും നാല് ദിവസം മുന്‍പ് പനിബാധിക്കുകയും പേവിഷബാധ ലക്ഷണങ്ങള്‍ കാണിക്കുകയും ചെയ്തതോടെ കുട്ടിയെ തിരൂരങ്ങാടി താലൂക്ക് ആശുപത്രിയില്‍ പ്രവേശിപ്പിച്ചിരുന്നു. അസുഖം മൂര്‍ച്ഛിച്ചതോടെ ഞായറാഴ്ചയാണ് കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്. അധികൃതരുടെ അനാസ്ഥയാണ് സംഭവത്തിന് കാരണമെന്നാണ് നാട്ടുകാര്‍ പരാതി ഉന്നയിക്കുന്നത്.

പടങ്ങള്‍: 1.കഴിഞ്ഞ 29ന് നായയുടെ ആക്രമണത്തില്‍ കുട്ടിക്ക് തലക്ക് ആഴത്തില്‍ മുറിവേറ്റ നിലയില്‍, 2.കാലിന് പരുക്കേറ്റ നിലയില്‍.

Five-year-old girl dies of rabies after being bitten by stray dog