മംഗളൂരു: മംഗളൂരു കുടുപ്പുവിൽ നടന്ന ഞെട്ടിക്കുന്ന ആൾക്കൂട്ട ആക്രമണത്തിൽ മലയാളി യുവാവ് കൊല്ലപ്പെട്ടു. വയനാട് പുൽപ്പള്ളി സ്വദേശി അഷ്റഫ് (38) ആണ് മരിച്ചത്. ‘പാകിസ്ഥാൻ സിന്ദാബാദ്’ മുദ്രാവാക്യം വിളിച്ചെന്നാരോപിച്ച് ഒരു സംഘം ആളുകൾ ചേർന്ന് അഷ്റഫിനെ ക്രൂരമായി മർദ്ദിച്ചതാണ് മരണകാരണം. സംഭവത്തിൽ 15 പേരെ പൊലീസ് അറസ്റ്റ് ചെയ്തു. 19 പേർക്കെതിരെ ആൾക്കൂട്ട ആക്രമണത്തിന് കേസെടുത്തിട്ടുണ്ട്.

ഞായറാഴ്ച വൈകുന്നേരം ഭത്ര കല്ലുർട്ടി ക്ഷേത്രത്തിന് സമീപമുള്ള മൈതാനത്ത് നടന്ന പ്രാദേശിക ക്രിക്കറ്റ് മത്സരത്തിനിടെയാണ് ആക്രമണം. ക്രിക്കറ്റ് ബാറ്റും സ്റ്റമ്പും ഉപയോഗിച്ച് സംഘം അഷ്റഫിനെ മർദ്ദിച്ചതായി പൊലീസ് വ്യക്തമാക്കി. ഗുരുതരമായി പരുക്കേറ്റ അഷ്റഫിനെ ആക്രമികൾ മൈതാനത്ത് ഉപേക്ഷിച്ച് രക്ഷപ്പെടുകയായിരുന്നു. സമയോചിതമായ ചികിത്സ ലഭിക്കാത്തതും ആൾക്കൂട്ട ആക്രമണവുമാണ് മരണ കാരണമെന്ന് പൊലീസ് വ്യക്തമാക്കി.

വെൻലോക്ക് ജില്ലാ ആശുപത്രിയിൽ നടത്തിയ പോസ്റ്റ്‌മോർട്ടത്തിൽ തലയിലും ദേഹത്തും ആഴത്തിലുള്ള മുറിവുകളും തുടർച്ചയായ മർദ്ദനവുമാണ് മരണകാരണമെന്ന് സ്ഥിരീകരിച്ചു. മൃതദേഹം മോർച്ചറിയിലേക്ക് മാറ്റിയിരിക്കുകയാണ്. കുടുപ്പു സ്വദേശി ദീപക് കുമാർ (33) നൽകിയ പരാതിയുടെ അടിസ്ഥാനത്തിലാണ് കേസെടുത്തത്. ആൾക്കൂട്ട ആക്രമണത്തിന് നേതൃത്വം നൽകിയത് കുടുപ്പു സ്വദേശി ടി. സച്ചിനാണെന്ന് പൊലീസ് പറഞ്ഞു.

അഷ്റഫിന് മാനസിക പ്രശ്നങ്ങൾ ഉണ്ടായിരുന്നതായും വിവിധയിടങ്ങളിൽ ചികിത്സ തേടിയിരുന്നതായും കുടുംബം അറിയിച്ചു. ബന്ധുക്കളുമായി അധികം ബന്ധം പുലർത്തിയിരുന്നില്ലെന്നും അവർ വ്യക്തമാക്കി. അഷ്റഫ് മലയാളം സംസാരിച്ചിരുന്നതായി പൊലീസ് സ്ഥിരീകരിച്ചു. കുടുംബം മംഗളൂരുവിൽ എത്തിയ ശേഷം മൃതദേഹം വിട്ടുനൽകുമെന്ന് അധികൃതർ അറിയിച്ചു.