ന്യൂഡൽഹി:  ജസ്റ്റിസ് ബി ആർ ഗവായ് ഇന്ത്യയുടെ 52-ാമത് ചീഫ് ജസ്റ്റിസായി നിയമിതനായി. മെയ് 14ന് അദ്ദേഹം ചുമതലയേൽക്കും. നിലവിലെ ചീഫ് ജസ്റ്റിസ് സഞ്ജീവ് ഖന്ന മെയ് 13ന് വിരമിക്കുന്ന ഒഴിവിലാണ് ജസ്റ്റിസ് ഗവായ് എത്തുന്നത്. കേന്ദ്ര നിയമമന്ത്രി അർജുൻ റാം മേഘ്‌വാൾ ഇക്കാര്യം അറിയിച്ചു. ജസ്റ്റിസ് കെ ജി ബാലകൃഷ്ണന് ശേഷം പട്ടികജാതി വിഭാഗത്തിൽ നിന്ന് ചീഫ് ജസ്റ്റിസാകുന്ന രണ്ടാമത്തെ വ്യക്തിയാണ് അദ്ദേഹം. 2025 നവംബർ 23 വരെ അദ്ദേഹം ഈ സ്ഥാനത്ത് തുടരും.

1960 നവംബർ 24ന് മഹാരാഷ്ട്രയിലെ അമരാവതിയിൽ ജനിച്ച ജസ്റ്റിസ് ഭൂഷൺ രാമകൃഷ്ണ ഗവായ്, പ്രശസ്ത സാമൂഹിക പ്രവർത്തകനും മുൻ ഗവർണറുമായിരുന്ന ആർ എസ് ഗവായിയുടെ മകനാണ്. 1985ൽ മുൻ അഡ്വക്കേറ്റ് ജനറലും ഹൈക്കോടതി ജഡ്ജിയുമായ രാജ എസ് ബോൺസാലെയുടെ കീഴിൽ നിയമപരിശീലനം ആരംഭിച്ചു. 1987 മുതൽ ബോംബെ ഹൈക്കോടതിയിൽ സ്വതന്ത്രമായി പ്രാക്ടീസ് ചെയ്ത അദ്ദേഹം, 1990 മുതൽ നാഗ്പൂർ ബെഞ്ചിൽ ശ്രദ്ധ കേന്ദ്രീകരിച്ചു. നാഗ്പൂർ, അമരാവതി മുനിസിപ്പൽ കോർപ്പറേഷനുകൾ, അമരാവതി സർവകലാശാല, സികോം തുടങ്ങിയ സ്ഥാപനങ്ങളെ പ്രതിനിധീകരിച്ചിട്ടുണ്ട്.

1992ൽ ബോംബെ ഹൈക്കോടതിയുടെ നാഗ്പൂർ ബെഞ്ചിൽ അസിസ്റ്റന്റ് ഗവൺമെന്റ് പ്ലീഡറായും 2000ൽ ഗവൺമെന്റ് പ്ലീഡറും പബ്ലിക് പ്രോസിക്യൂട്ടറുമായും നിയമിതനായി. 2003 നവംബർ 14ന് ബോംബെ ഹൈക്കോടതിയിൽ അഡീഷണൽ ജഡ്ജിയായും 2005 നവംബർ 12ന് സ്ഥിരം ജഡ്ജിയായും നിയമിതനായി. 2019 മെയ് 24ന് സുപ്രീം കോടതി ജഡ്ജിയായി ഉയർത്തപ്പെട്ടു.

സുപ്രീം കോടതിയിലെ മുതിർന്ന ജഡ്ജിയെ ചീഫ് ജസ്റ്റിസായി നിയമിക്കുന്ന കീഴ്വഴക്കപ്രകാരം, 2025 ഏപ്രിൽ 16ന് ജസ്റ്റിസ് സഞ്ജീവ് ഖന്ന ജസ്റ്റിസ് ഗവായിയെ ശുപാർശ ചെയ്തു. പ്രസിഡന്റ് ദ്രൗപതി മുർമു ഈ ശുപാർശ അംഗീകരിച്ച് നിയമനം നടത്തി.