ന്യൂഡല്‍ഹി: കേന്ദ്രസര്‍ക്കാര്‍ കൊണ്ടുവന്ന വഖ്ഫ് ഭേദഗതി നിയമത്തിനെതിരേ ഇന്ന് വിളക്കണച്ച് പ്രതിഷേധിക്കാന്‍ അഖിലേന്ത്യാ മുസ്ലിം വ്യക്തിനിയമ ബോര്‍ഡിന്റെ ആഹ്വാനം. ഐക്യദാര്‍ഢ്യത്തിന്റെയും സമാധാനപരമായ പ്രതിഷേത്തിന്റെയും ഭാഗമായി ഇന്ത്യയിലുടനീളമുള്ള എല്ലാ ജനാധിപത്യ വിശ്വാസികളോടും രാത്രി 9:00 മുതല്‍ 9:15 വരെയുള്ള 15 മിനിറ്റ് സമയം വീടുകളിലും കടകളിലും ജോലിസ്ഥലങ്ങളിലും വിളക്കുകള്‍ അണയ്ക്കണമെന്ന് അഭ്യര്‍ത്ഥിക്കുന്നതായി ബോര്‍ഡ് ജനറല്‍ സെക്രട്ടറി മൗലാനാ മുഹമ്മദ് ഫസലുര്‍റഹീം മുജദ്ദിദി വാര്‍ത്താസമ്മേളനത്തില്‍ പറഞ്ഞു.

ദൃഢനിശ്ചയത്തിന്റെ സന്ദേശമാണിതെന്നും നമ്മുടെ പോരാട്ടം നീതിയിലും ഭരണഘടനയിലും വേരൂന്നിയതാണെന്നും അദ്ദേഹം പറഞ്ഞു. വഖ്ഫ് നിയമത്തിനെതിരേ ബോര്‍ഡ് നടത്തിവന്ന പ്രക്ഷോഭപരിപാടികള്‍ പഹല്‍ഗാമില്‍ അടുത്തിടെ നടന്ന ഭീകരാക്രമണത്തിന്റെ പശ്ചാത്തലത്തില്‍ ഒരാഴ്ചയായി നിര്‍ത്തിവച്ചിരുന്നു. വിളക്കണക്കല്‍ ഉള്‍പ്പെടെയുള്ള മൂന്നുമാസം നീണ്ടുനില്‍ക്കുന്ന വ്യത്യത്സ സമരരീതികളാണ് ബോര്‍ഡ് നടത്താന്‍ പോകുന്നതെന്ന് വക്താവ് ഡോ. എസ്.ക്യു.ആര്‍ ഇല്യാസ് പറഞ്ഞു.

ഉത്തര്‍പ്രദേശിലെ 8,000ത്തിലധികം മദ്‌റസകള്‍ അടച്ചുപൂട്ടിയതും ഉത്തരാഖണ്ഡില്‍ ഏകീകൃത സിവില്‍ കോഡ് നടപ്പാക്കിയതും ഉള്‍പ്പെടെയുള്ള നടപടികളിലൂടെ മുസ്ലിംകളെയും സമുദായത്തിന്റെ സ്ഥാപനങ്ങളെയും ബി.ജെ.പി സര്‍ക്കാരുകള്‍ ആസൂത്രിതമായി ലക്ഷ്യംവയ്ക്കുകയാണെന്ന് അദ്ദേഹം ചൂണ്ടിക്കാട്ടി.

ബോർഡിൻ്റെ പ്രതിഷേധത്തിൽ കേരളവും അണിചേരും. ബോർഡ് ആഹ്വാനം ചെയ്ത പ്രതിഷേധത്തിൽ എല്ലാവരും പങ്കാളികളാകണമെന്ന് മുസ്‌ലിം സംഘടനാ നേതാക്കൾ അഭ്യർത്ഥിച്ചു. രാഷ്ട്രത്തിന്റെ ഭരണഘടനയെയും മുസ്‌ലിംകളുടെ വിശ്വാസ സ്വാതന്ത്ര്യത്തെയും അപകടപ്പെടുത്തുന്ന ഈ നീക്കത്തിൽ എല്ലാ പൗരന്മാരും പ്രതിഷേധിക്കണമെന്നും നേതാക്കൾ ആവശ്യപ്പെട്ടു.

 The All India Muslim Personal Law Board has called for people to turn off lights and protest today against the Waqf Amendment Act brought by the central government.