തിരുവനന്തപുരം: മുഖ്യമന്ത്രിയുടെ ചീഫ് പ്രിന്‍സിപ്പില്‍ സെക്രട്ടറി കെ.എം എബ്രഹാമിനെതിരായ സി.ബി.ഐ അന്വേഷണത്തിന് സ്റ്റേ. കെ.എം എബ്രഹാമിന്റെ ഹരജി പരിഗണിച്ച് സുപ്രിം കോടതിയാണ് സ്റ്റേ അനുവദിച്ചത്. ജസ്റ്റിസ് ദീപാങ്കര്‍ ദത്ത അധ്യക്ഷനായ ബെഞ്ചാണ് ഹരജി പരിഗണിച്ചത്. സി.ബി.ഐ അന്വേഷണത്തിന് അനുമതി നല്‍കിയ ഹൈകോടതി ഉത്തരവ് റദ്ദാക്കണമെന്നായിരുന്നു കെ.എം. എബ്രഹാമിന്റെ ഹരജിയിലെ ആവശ്യം.

2003 ജനുവരി മുതല്‍ 2015 ഡിസംബര്‍ വരെയുള്ള കാലയളവിലെ എബ്രഹാമിന്റെ സ്വത്ത് വിവരങ്ങളിലാണ് അന്വേഷണം. പൊതുപ്രവര്‍ത്തകനായ ജോമോന്‍ പുത്തന്‍പുരക്കല്‍ നല്‍കിയ ഹരജിയിലാണ് അന്വേഷണം. 2015ല്‍ ധനകാര്യ അഡീഷനല്‍ ചീഫ് സെക്രട്ടറിയായിരിക്കെ വരവില്‍ കവിഞ്ഞ സ്വത്ത് സമ്പാദിച്ചു എന്നാണ് ഹരജിയില്‍ ആരോപിക്കുന്നത്. 

എബ്രഹാമിന് മുംബൈയിലും തിരുവനന്തപുരത്തും യഥാക്രമം മൂന്നും ഒന്നും കോടി രൂപ മൂല്യമുള്ള ഫ്‌ളാറ്റുകളും കൊല്ലത്ത് എട്ട് കോടി രൂപ മൂല്യമുള്ള ഷോപ്പിങ് മാളും ഉണ്ട്. ഭാര്യയുടെയും മകളുടെയും പേരിലും വലിയ സമ്പാദ്യവും ഉണ്ട്. എന്നാല്‍ ഇതിന്റെയൊന്നും ഉറവിടം വെളിപ്പെടുത്തിയിട്ടില്ല എന്നാണ് ഹരജിക്കാരന്‍ ആരോപിക്കുന്നത്. മാത്രമല്ല, സിവില്‍ സര്‍വിസ് ഉദ്യോഗസ്ഥരുടെ പെരുമാറ്റച്ചട്ട പ്രകാരം വര്‍ഷം തോറും ചീഫ് സെക്രട്ടറിക്ക് നല്‍കേണ്ട ആസ്തി സംബന്ധിച്ച സ്റ്റേറ്റ്‌മെന്റും നല്‍കിയിട്ടില്ലെന്നും ആരോപണമുണ്ട്.

The Supreme Court has stayed the CBI investigation against K.M. Abraham, Chief Principal Secretary to the Kerala Chief Minister, based on a petition challenging the High Court's order.