ന്യൂഡല്‍ഹി: പഹല്‍ഗാമിലെ ഭീകരാക്രമണത്തിന് ശേഷം നിയന്ത്രണ രേഖയില്‍ പലയിടങ്ങളിലും വര്‍ദ്ധിച്ചുവരുന്ന സംഘര്‍ഷവും വെടിവയ്പ്പും കണക്കിലെടുത്ത്, ഇന്ത്യയുടെയും പാകിസ്ഥാന്റെയും ഡയറക്ടറേറ്റ് ജനറല്‍ ഓഫ് മിലിട്ടറി ഓപ്പറേഷന്‍സിലെ (ഡിജിഎംഒ) ഉന്നത ഉദ്യോഗസ്ഥര്‍ ഹോട്ട്‌ലൈനില്‍ ആശയവിനിമയം നടത്തി. സംഭാഷണത്തിനിടെ നിയന്ത്രണ രേഖയില്‍ പാകിസ്ഥാന്‍ നടത്തുന്ന ഒന്നിലധികം വെടിനിര്‍ത്തല്‍ ലംഘനങ്ങളെ ഇന്ത്യന്‍ സൈന്യം ശക്തമായി എതിര്‍ക്കുകയും പ്രകോപനമില്ലാതെ വെടിവയ്പ്പ് നടത്തുന്നതിനെതിരെ പാകിസ്ഥാന്‍ സൈന്യത്തിന് മുന്നറിയിപ്പ് നല്‍കുകയും ചെയ്തു. ആഴ്ചതോറും നടത്തുന്ന ഫോണ്‍ കോളിന്റെ ഭാഗമായ ആശയവിനിമയമാണിതെന്നാണ് പ്രതിരോധ വൃത്തങ്ങള്‍ അറിയിച്ചത്.

പാക് സൈന്യം വെടിനിര്‍ത്തല്‍ ലംഘിച്ചതായി ഇന്ത്യ ചൂണ്ടിക്കാട്ടി. ബാരാമുള്ള, കുപ്വാര ജില്ലകളിലെ നിയന്ത്രണ രേഖയ്ക്ക് അപ്പുറത്തുള്ള പാക് പോസ്റ്റുകളില്‍ നിന്നും പര്‍ഗ്വാള്‍ സെക്ടറിലെ അന്താരാഷ്ട്ര അതിര്‍ത്തിക്കപ്പുറത്തുനിന്നും പാകിസ്ഥാന്‍ സൈന്യം പ്രകോപനമില്ലാതെ ചെറിയ ആയുധങ്ങള്‍ ഉപയോഗിച്ച് വെടിവച്ചതായി ഇന്ത്യ പറഞ്ഞു. പാക് പ്രകോപനത്തിന് ഇന്ത്യന്‍ സൈനികര്‍ ഉചിതമായി പ്രതികരിച്ചതായും പ്രതിരോധ വക്താവ് പറഞ്ഞു. പഹല്‍ഗാം ആക്രമണത്തെത്തുടര്‍ന്ന് അതിര്‍ത്തിയില്‍ നിലനിന്ന യുദ്ധാന്തരീക്ഷം തണുപ്പിക്കുന്നതാണ് ഇരുരാജ്യത്തെയും സൈനിക ഉദ്യോഗസ്ഥരുടെ സംഭാഷണമെന്നാണ് റിപ്പോര്‍ട്ട്.

പുതിയ സാഹചര്യത്തില്‍ റഷ്യന്‍ സന്ദര്‍ശനം പ്രധാനമന്ത്രി നരേന്ദ്രമോദി റദ്ദാക്കി. ഈ മാസം ഒമ്പതിന് റഷ്യയില്‍ നടക്കുന്ന റഷ്യന്‍ വിജയദിനാഘോഷങ്ങളില്‍ മോദി പങ്കെടുക്കേണ്ടതായിരുന്നു. ഇതാണ് റദ്ദാക്കിയത്. പാകിസ്താനെതിരായ നടപടി കടുപ്പിക്കുന്നതിന്റെ ഭാഗമായി മരുന്നുകളടക്കം കയറ്റുമതി ചെയ്യുന്ന വ്യാപാര ഇടപാടുകള്‍ ഇന്ത്യ അവസാനിപ്പിക്കും. പ്രത്യേക പാര്‍ലമെന്റ് സമ്മേളനമെന്ന പ്രതിപക്ഷ ആവശ്യം സര്‍ക്കാര്‍ പരിഗണിക്കാനാണ് സാധ്യതയെന്നും ഉന്നത വൃത്തങ്ങള്‍ അറിയിച്ചു. ഭീകരാക്രമണത്തിന് ശേഷമുള്ള സ്ഥിതിഗതികളും സുരക്ഷകാര്യങ്ങളും ഇന്നലെ പ്രധാനമന്ത്രിയുടെ അധ്യക്ഷതയില്‍ ചേര്‍ന്ന പ്രത്യേക കേന്ദ്ര മന്ത്രിസഭാ സമിതി അവലോകനം ചെയ്തു. നേരത്തെ പാകിസ്താനെതിരെ തിരിച്ചടിക്കാന്‍ ഇന്ത്യന്‍ സൈന്യത്തിന് കേന്ദ്രസര്‍ക്കാര്‍ പൂര്‍ണാധികാരം നല്‍കിയിരുന്നു. 

സംഘര്‍ഷം ലഘൂകരിക്കാന്‍ ഇന്ത്യയോടും പാകിസ്താനോടും അമേരിക്ക അഭ്യര്‍ഥിച്ചു. വിദേശകാര്യ മന്ത്രി എസ് ജയ്ശങ്കറുമായും പാക് പ്രധാനമന്ത്രി ഷെഹ്ബാസ് ഷെരീഫുമായും യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോ സംസാരിച്ചു. തീവ്രവാദത്തിനെതിരെ ഇന്ത്യയുമായി സഹകരിക്കാനുള്ള യുഎസിന്റെ പ്രതിബദ്ധത സംസാരത്തില്‍ യു.എസ് ആവര്‍ത്തിച്ചു. മനസ്സാക്ഷിയില്ലാത്ത ഭീകരാക്രമണം എന്നാണ് പഹല്‍ഗാമിലെ ആക്രമണത്തെ യു.എസ് വിശേഷിപ്പിച്ചത്. സംഭവം അന്വേഷിക്കുന്നതില്‍ പാകിസ്ഥാന്റെ സഹകരണവും യു.എസ് ആവശ്യപ്പെട്ടു.

ജയ്ശങ്കറുമായുള്ള സംഭാഷണത്തിനിടെ, പഹല്‍ഗാമിലെ ഭീകരമായ ഭീകരാക്രമണത്തില്‍ നഷ്ടപ്പെട്ട ജീവന്‍ നഷ്ടപ്പെട്ടവര്‍ക്ക് റൂബിയോ ദുഃഖം രേഖപ്പെടുത്തി. സംഘര്‍ഷം ലഘൂകരിക്കാനും ദക്ഷിണേഷ്യയില്‍ സമാധാനവും സുരക്ഷയും നിലനിര്‍ത്താനും പാകിസ്ഥാനുമായി സഹകരിക്കാനും അദ്ദേഹം ഇന്ത്യയെ പ്രോത്സാഹിപ്പിച്ചതായി യുഎസ് സ്റ്റേറ്റ് ഡിപ്പാര്‍ട്ട്‌മെന്റ് വക്താവ് ടാമി ബ്രൂസ് പറഞ്ഞു. ആണവശക്തിയുള്ള രണ്ട് രാജ്യങ്ങളുടെയും നേതാക്കള്‍ തമ്മിലുള്ള സംഘര്‍ഷം ലഘൂകരിക്കാന്‍ പ്രവര്‍ത്തിക്കണമെന്ന് യുണൈറ്റഡ് സ്റ്റേറ്റ്‌സിന്റെ ഉന്നത പ്രതിനിധി ആവശ്യപ്പെട്ടതായി ഔദ്യോഗികവൃത്തങ്ങള്‍ പറഞ്ഞു. 

US Secretary Of State Marco Rubio Dials India's S Jaishankar and Pak PM