ധാക്ക: 1971ല്‍ പാകിസ്താനില്‍ നിന്നു സ്വാതന്ത്ര്യം നേടുന്നതിനുള്ള സമരത്തിനിടെ യുദ്ധക്കുറ്റം നടത്തിയ ജമാഅത്തെ ഇസ്‌ലാമി നേതാവിനെ ബംഗ്ലാദേശ് തൂക്കിലേറ്റി. ബംഗ്ലാദേശിലെ ഏറ്റവും വലിയ പ്രതിപക്ഷ പാര്‍ട്ടിയാണ് ജമാഅത്തെ ഇസ്‌ലാമി. പാര്‍ട്ടിയുടെ പ്രധാന സാമ്പത്തിക സഹായിയായ മിര്‍ ഖാസിം അലി (63) യെയാണ് തൂക്കിലേറ്റിയത്. യുദ്ധക്കുറ്റ ട്രൈബ്യൂണല്‍ കുറ്റക്കാരനാണെന്നു കണ്ടെത്തിയതിനെ തുടര്‍ന്നായിരുന്നു ഖാസിമിന് വധശിക്ഷ വിധിച്ചത്.
ഗാസിപൂരിലെ ജയിലില്‍ വച്ചാണ് വധശിക്ഷ നടപ്പാക്കിയത്. ധാക്കയില്‍ നിന്നു വടക്ക് 40 കി.മി അകലെയാണ് ഗാസിപൂര്‍. രാവിലെ 10.35 നാണ് ഖാസിം അലിയെ തൂക്കിലേറ്റിയതെന്ന് ബംഗ്ലാദേശ് നീതിന്യായ മന്ത്രി അനിസുല്‍ ഹഖ് പറഞ്ഞു. 2010ല്‍ പ്രധാനമന്ത്രി ഷെയ്ഖ് ഹസീന സ്ഥാപിച്ച യുദ്ധക്കുറ്റ ട്രൈബ്യൂണലാണ് ജമാഅത്ത് നേതാക്കള്‍ക്ക് വധശിക്ഷ വിധിച്ചത്. ഇതില്‍ തൂക്കിലേറ്റിയ ആറു പേരും പ്രതിപക്ഷ നേതാക്കളാണ്. അലിയുടെ വധ ശിക്ഷ നടപ്പാക്കിയതിലൂടെ അഞ്ചാമത്തെ ജമാഅത്ത് നേതാവിനെയും തൂക്കിലേറ്റി.
കഴിഞ്ഞ ദിവസം സുപ്രിം കോടതി ഖാസിം അലിയുടെ അപ്പീല്‍ തള്ളിയതിനെ തുടര്‍ന്നാണ് ശിക്ഷ നടപ്പാക്കിയതെന്നും എന്നാല്‍ പ്രസിഡന്റിന്റെ ദയാ ഹരജി തനിക്കു വേണ്ടെന്ന് അലി പറഞ്ഞതായും പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.