തിരുവനന്തപുരം: കോൺഗ്രസിൽ നേതാക്കൾക്കും പ്രവർത്തകർക്കും പെരുമാറ്റച്ചട്ടം ഏർപ്പെടുത്തി നേതൃത്വം. കോഴിക്കോട് ഡി.സി.സി ഓഫിസ് ഉദ്ഘാടന ചടങ്ങിലെ നേതാക്കളുടെ തള്ളിക്കയറ്റം സമൂഹമാധ്യമങ്ങളിലടക്കം ചർച്ചയാകുകയും കെ.പി.സി.സി അധ്യക്ഷൻ കെ. സുധാകരൻ വിമർശനം ഉന്നയിക്കുകയും ചെയ്തതിന് പിന്നാലെയാണ് നടപടി. പൊതുപരിപാടികൾ തീരുമാനിച്ചതിലും വൈകി നടത്താൻ പാടില്ല. സ്വാഗത പ്രാസംഗികർ ചുരുക്കി സംസാരിക്കണം. ജാഥകളിൽ ബാനറുകളുടെ പുറകിൽ മാത്രം നടക്കണം. 

പ്രതിഷേധ പ്രകടനത്തിലെ മുദ്രാവാക്യങ്ങൾ പാർട്ടി സംസ്കാരത്തിന് യോജിച്ചതാവണം. ദൃശ്യമാധ്യമങ്ങളോട് നേതാക്കൾ സംസാരിക്കുമ്പോൾ പുറകിൽ തിക്കുംതിരക്കും കൂട്ടരുതെന്നും പെരുമാറ്റച്ചട്ടത്തിൽ പറയുന്നു. പൊതുപരിപാടികളിൽ ഭാരവാഹികൾ മാത്രമേ വേദിയിൽ ഉണ്ടാകാൻ പാടുള്ളൂവെന്നും പ്രധാന നേതാക്കൾ പങ്കെടുക്കുന്ന പരിപാടികളിൽ കസേരകളിൽ പേരെഴുതിവയ്ക്കണമെന്നും നിർദേശത്തിലുണ്ട്. പരിപാടികളിൽ ലിംഗ നീതിയും സാമൂഹ്യനീതിയും ഉറപ്പുവരുത്തണമെന്നും പെരുമാറ്റച്ചട്ടത്തിൽ ചൂണ്ടിക്കാട്ടുന്നു. പെരുമാറ്റച്ചട്ടം ലംഘിക്കുന്നത് അച്ചടക്ക ലംഘനമായി കണക്കാക്കുമെന്നും നടപടികൾ ഉണ്ടാകുമെന്നും പറയുന്നു. പാർട്ടിയുടെ വിവിധ സംഘടനായോഗങ്ങളിൽ പെരുമാറ്റച്ചട്ടം സംബന്ധിച്ച സർക്കുലർ റിപ്പോർട്ട് ചെയ്യാനും നിർദേശിച്ചിട്ടുണ്ട്.

Congress issues code of conduct only office bearers on stage at public events