ദോഹ: ഞായറാഴ്ച രാവിലെ അബൂദബിയിൽ എത്തിയ ഖത്തർ അമീർ ശൈഖ് തമീം ബിൻ ഹമദ് അൽ താനിയും, യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്‌യാനും തമ്മിൽ കൂടിക്കാഴ്ച നടത്തി.

പൊതുവായി ആശങ്കകളുള്ള നിരവധി പ്രാദേശിക, ആഗോള പ്രശ്‌നങ്ങളെക്കുറിച്ചും, പ്രത്യേകിച്ച് മേഖലയിലെ ഏറ്റവും പുതിയ സംഭവവികാസങ്ങളെ ക്കുറിച്ചുമാണ് ഇരുവരും തമ്മിലുള്ള കൂടിക്കാഴ്ചയിൽ പ്രധാനമായും ചർച്ച ചെയ്തത്.

യുഎഇ പ്രസിഡന്റ്‌ ശൈഖ് മുഹമ്മദ്‌ ബിൻ സായിദ് അൽ നഹ്യാന്റെ പ്രത്യേക ക്ഷണ പ്രകാരം സഹോദര സന്ദർശനത്തിനായാണ് ഞാറാഴ്ച രാവിലെ ഖത്തർ അമീർ ശൈഖ് തമീം ബിൻ ഹമദ് അൽതാനി ദോഹയിൽ നിന്നും അബുദാബിയിലേക്ക് പുറപ്പെട്ടത്. പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിൻ അബ്ദുൾറഹ്മാൻ ബിൻ ജാസിം അൽതാനിയും ഒരു ഔദ്യോഗിക പ്രതിനിധി സംഘവും അമീറിനൊപ്പമുണ്ടായിരുന്നു.

അബൂദബിയിലെ അൽ ഷാതി പാലസിൽ നടന്ന യോഗത്തിൽ ഇരു രാജ്യങ്ങളിലെയും ജനങ്ങളുടെ നന്മയ്ക്കും താൽപ്പര്യത്തിനും വേണ്ടി ഒന്നിലധികം മേഖലകളിൽ ദീർഘകാലമായി നിലനിൽക്കുന്ന സാഹോദര്യ ബന്ധങ്ങളെക്കുറിച്ചും അവയെ ശക്തിപ്പെടുത്തുന്നതിനുള്ള വഴികളെക്കുറിച്ചും ചർച്ച ചെയ്തു.

ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിൻ അബ്ദുൾറഹ്മാൻ ബിൻ ജാസിം അൽതാനി, ആഭ്യന്തര മന്ത്രിയും ആഭ്യന്തര സുരക്ഷാ സേന (ലെഖ്‌വിയ) കമാൻഡറുമായ ശൈഖ് ഖലീഫ ബിൻ ഹമദ് ബിൻ ഖലീഫ അൽതാനി, അമീരി ദിവാൻ  ചീഫ് അബ്ദുള്ള ബിൻ മുഹമ്മദ്‌ ബിൻ മുബാറക് അൽ കുലൈഫി എന്നിവർ യോഗത്തിൽ പങ്കെടുത്തു.കൂടാതെ  അമീറിനൊപ്പമുള്ള ഔദ്യോഗിക പ്രതിനിധി സംഘത്തിലെ വിശിഷ്ടാംഗങ്ങളും യോഗത്തിൽ സന്നിഹിതരായിരുന്നു.

യുഎഇയുടെ ഭാഗത്ത് നിന്നും  യുഎഇ വൈസ് പ്രസിഡണ്ടും, ഉപപ്രധാനമന്ത്രിയും, പ്രസിഡൻഷ്യൽ കോടതി മന്ത്രിയുമായ ശൈഖ് മൻസൂർ ബിൻ സായിദ് അൽ നഹ്യാൻ, അബൂദബി ഡെപ്യൂട്ടി ഭരണാധികാരിയും ദേശീയ സുരക്ഷാ ഉപദേഷ്ടാവുമായ ശൈഖ് തഹ്‌നൂൻ ബിൻ സായിദ് അൽ നഹ്യാൻ, ഉപപ്രധാനമന്ത്രിയും ആഭ്യന്തര മന്ത്രിയുമായ ലെഫ്ടനന്റ് ജനറൽ ശൈഖ് സെയ്ഫ് ബിൻ സായിദ് അൽ നഹ്യാൻ തുടങ്ങിയവരും ഉന്നത ഉദ്യോഗസ്ഥരും യോഗത്തിൽ സംബന്ധിച്ചു.
കൂടാതെ, യു എ ഇ പ്രസിഡന്റ്‌ ശൈഖ് മുഹമ്മദ്‌ ബിൻ സായിദ് അൽ നഹ്യാൻ ബഹുമാനാർത്ഥം ഒരുക്കിയ ഉച്ചഭക്ഷണ വിരുന്നിലും ഖത്തർ അമീർ ശൈഖ് തമീം ബിൻ ഹമദ് അൽത്താനിയും പ്രതിനിധി സംഘവും പങ്കെടുത്തു.

Qatar Emir Sheikh Tamim bin Hamad Al Thani held a key meeting with UAE President Sheikh Mohammed bin Zayed Al Nahyan in Abu Dhabi, strengthening bilateral ties and regional cooperation.