അബൂദബി: ഇത്തിഹാദ് എയര്‍വേയ്‌സിന്റെയും അബൂദബി ടൂറിസം വകുപ്പിന്റെയും സംയുക്ത സംരഭമായ സ്റ്റോപ്പ് ഓവര്‍ പ്രോഗ്രാം വഴി അബൂദബി സന്ദര്‍ശിച്ച വിനോദസഞ്ചാരികളുടെ എണ്ണത്തില്‍ 76% വര്‍ധന.

ഈ വര്‍ഷം മാത്രം ഒന്നര ദശലക്ഷത്തോളം സ്‌റ്റോപ്പ് ഓവര്‍ യാത്രക്കാരെയാണ് ഇത്തിഹാദ് എയര്‍വേയ്‌സ് പ്രതീക്ഷിക്കുന്നത്. 

2025ലെ ആദ്യ മൂന്നു മാസങ്ങളില്‍ 14 ലക്ഷം യാത്രക്കാരാണ് അബൂദബി സന്ദര്‍ശിച്ചത്. ഇതില്‍ 44,000 പേര്‍ ഇത്തിഹാദ് എയര്‍വേയ്‌സിന്റെ സ്റ്റോപ്പ് ഓവര്‍ പ്രോഗ്രാം ഉപയോഗപ്പെടുത്തിയാണ് എമിറേറ്റ് സന്ദര്‍ശിച്ചത്. 2024ല്‍ ഇതേ കാലയലവില്‍ കാല്‍ ലക്ഷം വിനോദസഞ്ചാരികളാണ് സ്‌റ്റോപ്പ് ഓവര്‍ പ്രോഗ്രാം ഉപയോഗപ്പെടുത്തി അബൂദബി സന്ദര്‍ശിച്ചത്. 

2025ല്‍ ശക്തമായ തുടക്കമാണ് ലഭിച്ചത്. ഈ വിജയം 2024ന്റെ തുടര്‍ച്ചയാണ്, 2024ല്‍ 85,000 സ്റ്റോപ്പ് ഓവര്‍ സന്ദര്‍ശകരെയാണ് സ്വാഗതം ചെയ്തത്, 2023ല്‍ ഇത് 12,000-ായിരുന്നു,' ഇത്തിഹാദ് എയര്‍വേയ്‌സ് അധികൃതര്‍ പറഞ്ഞു.  

ഇത്തിഹാദിന്റെ ഔദ്യോഗിക പ്രസ്താവന പ്രകാരം, സ്റ്റോപ്പ് ഓവര്‍ പ്രോഗ്രാമിലേക്കുള്ള ബുക്കിംഗുകളും വര്‍ധിച്ചിട്ടുണ്ട്. 

അമേരിക്ക, കാനഡ, യുണൈറ്റഡ് കിംഗ്ഡം, ജര്‍മ്മനി, ഫ്രാന്‍സ്, ഇന്ത്യ, ജപ്പാന്‍, ദക്ഷിണ കൊറിയ എന്നീ രാജ്യങ്ങളില്‍ നിന്നുള്ള വിനോദസഞ്ചാരികളാണ് സ്‌റ്റോപ്പ് ഓവര്‍ പ്രോഗ്രാം ഉപയോഗിക്കുന്ന രാജ്യക്കാരില്‍ മുന്‍പന്തിയില്‍.

'ഡാറ്റ അടിസ്ഥാനമാക്കിയുള്ള മാര്‍ക്കറ്റിംഗ്, വൈവിധ്യമാര്‍ന്ന പ്രോഗ്രാമിംഗ്, സംസ്‌കാരത്തിന് പ്രഥമ പരിഗണന നല്‍കുന്ന സമീപനം എന്നിവ അബൂദബിയുടെ ടൂറിസം മേഖലയുടെ വളര്‍ച്ചയില്‍ കാരണമായിട്ടുണ്ട്,' ഡിസിടി അബൂദബിയിലെ ടൂറിസം ഡയറക്ടര്‍ ജനറല്‍ സാലിഹ് മുഹമ്മദ് അല്‍ ഗസിരി പറഞ്ഞു.

സ്റ്റോപ്പ് ഓവര്‍ പ്രോഗ്രാമിന്റെ വിജയം പങ്കാളിത്തം ശക്തിപ്പെടുത്താനും ആഗോള വ്യാപ്തി വര്‍ധിപ്പിക്കാന്‍ സഹായിക്കുമെന്നും എമിറേറ്റിന്റെ സാംസ്‌കാരിക ഐഡന്റിറ്റി ഇതിന്റെ കേന്ദ്രബിന്ദുവായി നിലനിര്‍ത്തുമെന്നും അദ്ദേഹം കൂട്ടിച്ചേര്‍ത്തു. 

എന്താണ് സ്റ്റോപ്പ് ഓവര്‍ പ്രോഗ്രാം?
അബൂദബി അന്താരാഷ്ട്ര വിമാനത്താവളം വഴി സഞ്ചരിക്കുന്ന യാത്രക്കാര്‍ ഇവിടെ ഇറങ്ങി നിശ്ചിത ദിവസം താമസിച്ച് അബൂദബിയിലെ ടൂറിസം കേന്ദ്രങ്ങള്‍ സന്ദര്‍ശിച്ച് ഇതേ എയര്‍ലൈനില്‍ യാത്ര തുടരുന്നവരാണ് സ്റ്റോപ്പ് ഓവര്‍ പാസന്‍ജേഴ്‌സ്.

Abu Dhabi experiences a sharp rise in tourist arrivals, thanks to the overwhelming success of Etihad Airways' stopover program launched in partnership with the Tourism Department.