നെടുമ്പാശ്ശേരി: അഞ്ചാം വര്‍ഷത്തിലേക്ക് പ്രവേശിക്കുന്നവരുടെ എണ്ണം അടുത്ത വര്‍ഷം 9,144 എണ്ണമായി ഉയരുമെന്നതിനാല്‍ 2017ല്‍ കേരളത്തിന് കൂടുതല്‍ സീറ്റുകള്‍ ആവശ്യമായി വരുമെന്ന് ഹജ്ജ് കമ്മിറ്റി ചെയര്‍മാന്‍ കോട്ടുമല ബാപ്പു മുസ്‌ലിയാര്‍ പറഞ്ഞു. ഓരോ വര്‍ഷവും റിസര്‍വേഷന്‍ കാറ്റഗറികളില്‍ ലഭിക്കുന്ന എല്ലാ അപേക്ഷകളും പരിഗണിച്ച് അവസരം നല്‍കുന്ന സംവിധാനം സ്വീകരിക്കണമെന്ന് ഹജ്ജ് കമ്മിറ്റി കേന്ദ്രത്തോട് ആവശ്യപ്പെട്ടിട്ടുണ്ട്.
കേന്ദ്ര ഹജ്ജ് കമ്മിറ്റി സംസ്ഥാനങ്ങള്‍ക്ക് സീറ്റുകള്‍ അനുവദിക്കുമ്പോള്‍ റിസര്‍വേഷന്‍ വിഭാഗക്കാരെ ഒറ്റ യൂനിറ്റായി പരിഗണിക്കണമെന്ന ആവശ്യവും കേന്ദ്ര കമ്മിറ്റിക്ക് മുമ്പില്‍ അവതരിപ്പിച്ചിട്ടുണ്ട്. മറ്റ് സംസ്ഥാനങ്ങളിലെ അഞ്ചാംവര്‍ഷക്കാര്‍ വെയിറ്റിംഗ് ലിസ്റ്റില്‍ നിലകൊള്ളുമ്പോള്‍ കേരളത്തിലെ എല്ലാ അഞ്ചാംവര്‍ഷ അപേക്ഷകരെയും അയക്കുന്നതിന് സാധിച്ചു. ഹജ്ജ് ക്യാംപിന്റെ വിജയം കൂട്ടായപ്രവര്‍ത്തനത്തിന്റേതാണെന്നും ഇക്കാര്യത്തില്‍ എല്ലാവരോടും നന്ദി അറിയിക്കുകയാണെന്നും അദ്ദേഹം പറഞ്ഞു.