റിയാദ്: അഴിമതി നടത്തിയ 140 സര്‍ക്കാര്‍ ഉദ്യോഗസ്ഥര്‍ അറസ്റ്റില്‍. സഊദി അറേബ്യയിലെ അഴിമതി വിരുദ്ധ നിരീക്ഷണ ഏജന്‍സിയായ നസഹയാണ് ഇവരെ അറസ്റ്റു ചെയ്തത്. ഉദ്യോഗസ്ഥ തലത്തിലെ അഴിമതിക്കെതിരെ നടത്തുന്ന തുടര്‍ച്ചയായ നടപടികളുടെ ഭാഗമായാണ് ശക്തമായ നടപടി.

ആഭ്യന്തരം, പ്രതിരോധം, നീതി, വിദ്യാഭ്യാസം, മുനിസിപ്പാലിറ്റികള്‍, ഭവന, പരിസ്ഥിതി, ജലം, കൃഷി എന്നീ മന്ത്രാലയങ്ങളിലെയും കിംഗ് ഫഹദ് കോസ്വേ അതോറിറ്റിയിലെയും ജീവനക്കാരെയാണ് അറസ്റ്റു ചെയ്തതെന്ന് നസഹ പറഞ്ഞു.

കൈക്കൂലി വാങ്ങി, വ്യക്തിപരമായ നേട്ടങ്ങള്‍ക്കായി തങ്ങളുടെ സ്ഥാനങ്ങള്‍ ചൂഷണം ചെയ്തു എന്നീ കുറ്റങ്ങളാണ് ഇവര്‍ക്കെതിരെ ചുമത്തിയിരിക്കുന്നത്.

കഴിഞ്ഞ മാസം 2,807 ഓഫീസുകളില്‍ പര്യടനം നടത്തിയെന്നും 385 പേരെ ചോദ്യം ചെയ്യലിനു വിധേയമാക്കിയെന്നും നസഹ അറിയിച്ചു. വിശദമായ ചോദ്യം ചെയ്യലിനു ശേഷമാണ് ഇവരെ അറസ്റ്റു ചെയ്തത്.

മാര്‍ച്ചില്‍, വിവിധ മന്ത്രാലയങ്ങളിലായി 82 മറ്റ് സര്‍ക്കാര്‍ ജീവനക്കാരെ കൈക്കൂലി, സ്വാധീനം ചെലുത്തല്‍ എന്നീ കുറ്റങ്ങള്‍ ചുമത്തി കസ്റ്റഡിയിലെടുത്തതായി അതോറിറ്റി അറിയിച്ചിരുന്നു. ഓഫീസ് ദുരുപയോഗം ചെയ്യുന്നവരെ നിരീക്ഷിക്കുന്നതിനും, തുറന്നുകാട്ടുന്നതിനും, പ്രോസിക്യൂട്ട് ചെയ്യുന്നതിനുമുള്ള പ്രതിബദ്ധത നസഹ ആവര്‍ത്തിച്ചു. 

സമീപ വര്‍ഷങ്ങളില്‍, സഊദി അറേബ്യയില്‍ നൂറുകണക്കിന് സര്‍ക്കാര്‍ ജീവനക്കാരെയും ബിസിനസുകാരെയും അഴിമതി നടത്തിയതിനും പൊതുപണം ദുരുപയോഗം ചെയ്തതിനും കസ്റ്റഡിയിലെടുത്തിട്ടുണ്ട്.

ജനുവരിയില്‍, അഴിമതി, കള്ളപ്പണം വെളുപ്പിക്കല്‍, സ്വാധീന വ്യാപാരം എന്നീ കുറ്റങ്ങള്‍ ചുമത്തി സര്‍ക്കാര്‍ ജീവനക്കാര്‍ ഉള്‍പ്പെടെ 1,708 പേരെ സഊദി അധികൃതര്‍ അറസ്റ്റ് ചെയ്തിരുന്നു.