ഫുട്ബോളിൽ നിരവധി മുന്നേറ്റ നിര താരങ്ങളെ തടഞ്ഞുനിർത്തുന്നതിൽ വലിയ പരിചയ സമ്പത്തുള്ള ഡിഫൻഡറാണ് ലിവർപൂൾ താരം വിർജിൽ  വാൻ ഡൈക്ക്. ഇപ്പോഴിതാ കളിക്കളത്തിൽ താൻ നേരിട്ടതിൽ ഏറ്റവും വെല്ലുവിളി സൃഷ്ടിച്ച താരങ്ങൾ ആരൊക്കെയാണെന്ന് പറഞ്ഞിരിക്കുകയാണ് വാൻ ഡിക്. ഇതിഹാസ താരങ്ങളായ ലയണൽ മെസി, ക്രിസ്റ്റ്യാനോ റൊണാൾഡോ എന്നീ താരങ്ങളെയാണ് ലിവർപൂൾ താരം തെരഞ്ഞെടുത്തത്. ടിബിആർ ഫുട്ബോളിലൂടെ സംസാരിക്കുകയായിരുന്നു വാൻ ഡൈക്ക്. 

''ലയണൽ മെസിയും ക്രിസ്റ്റ്യാനോ റൊണാൾഡോയും ഇവർ രണ്ട് പേരും മികച്ച താരങ്ങളാണ്. ഇവരെ പ്രതിരോധിക്കാൻ വളരെ ബുദ്ധിമുട്ടാണ്. എന്റെ അഭിപ്രായത്തിൽ ഈ മികച്ച താരങ്ങൾക്കെതിരെ കളിക്കുന്നത് എപ്പോഴും നല്ലതാണ്. എപ്പോഴും സ്വയം വെല്ലുവിളികൾ സ്വീകരിക്കാൻ സാധിക്കും. ഫുട്ബോളിൽ എല്ലായ്‌പോഴും മികച്ചതായിരിക്കണം'' ലിവർപൂൾ താരം പറഞ്ഞു. 

റൊണാൾഡോ നിലവിൽ സഊദി ക്ലബായ അൽ നസറിന്റെ താരമാണ്. 2022ലാണ് റൊണാൾഡോ മാഞ്ചസ്റ്റർ യുണൈറ്റഡിൽ നിന്നും അൽ നസറിലെത്തുന്നത്  റൊണാൾഡോയുടെ വരവോടെ സഊദി ലീഗിൽ വലിയ മാറ്റങ്ങളാണ് സംഭവിച്ചിട്ടുള്ളത്. റൊണാൾഡോയുടെ കടന്നുവരവോടെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. റൊണാൾഡോക്ക് പിന്നാലെ യൂറോപ്പിലെ വിവിധ ക്ലബ്ബുകളിലെ പ്രധാന താരങ്ങൾ ചേക്കേറിയിരുന്നു. കരിം ബെൻസിമ, നെയ്മർ, സാദിയോ മാനെ, റിയാദ് മെഹറസ്, റോബർട്ടോ ഫിർമീഞ്ഞോ തുടങ്ങിയ പ്രധാന താരങ്ങളും സഊദിയിലേക്ക് മാറിയിരുന്നു. 

നിലവിൽ മെസി അമേരിക്കൻ ക്ലബ് ഇന്റർ മയാമിയുടെ താരമാണ്. 2023ലാണ് മെസി പാരീസ് വിട്ട് മേജർ ലീഗിലേക്ക് പോയത്. മെസിയുടെ വരവോടെ ഇന്റർ മയാമി വേണ്ടി മിന്നും പ്രകടനമാണ് നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. ഇതിന് പുറമെ സപ്പോർട്ടേഴ്‌സ് ഷീൽഡും മയാമി സ്വന്തമാക്കി. 

Van Dijk has revealed who the players he has faced have been the most challenging on the field