ഹൈദരാബാദ്: ഐപിഎല്ലിൽ ഡൽഹി ക്യാപ്പിറ്റൽസും സൺറൈസേഴ്‌സ് ഹൈദെരാബാദും തമ്മിലുള്ള മത്സരം മഴ മൂലം ഉപേക്ഷിച്ചു. ഡൽഹിയുടെ ബാറ്റിങ്ങിന് ശേഷം മഴ വില്ലനായി എത്തുകയായിരുന്നു. പിന്നീട് മഴ നിർത്താതെ പെയ്തപ്പോൾ ഇരു ടീമുകളും പോയിന്റുകൾ പങ്കുവെക്കുകയായിരുന്നു. ഡൽഹിക്ക് നിലവിൽ 13 പോയിന്റാണ് ഉള്ളത്. ഓറഞ്ച് ആർമിയുടെ കൈവശം ഒരു ഏഴു പോയിന്റുമുണ്ട്.  

ഹൈദരാബാദിന്റെ തട്ടകമായ രാജീവ് ഗാന്ധി സ്റ്റേഡിയത്തിൽ നടന്ന മത്സരത്തിൽ ടോസ് നേടിയ ഹൈദരാബാദ് ബൗളിംഗ് തെരഞ്ഞെടുക്കുകയായിരുന്നു. ആദ്യം ബാറ്റ് ഡൽഹി ഏഴു വിക്കറ്റ് നഷ്ടത്തിൽ 133 റൺസാണ് നേടിയത്. ഹൈദരാബാദ് ബൗളിങ്ങിൽ നായകൻ പാറ്റ് കമ്മിൻസ് മൂന്ന് വിക്കറ്റുകൾ നേടി തിളങ്ങി. നാല് ഓവറിൽ വെറും 19 റൺസ് വിട്ടുനൽകിയാണ് കമ്മിൻസ് മൂന്ന് വിക്കറ്റുകൾ നേടിയത്. എഷാൻ മലിംഗ, ജയ്‌ദേവ് ഉനദ്കട്ട്, ഹർഷൻ പട്ടേൽ എന്നിവർ ഓരോ വിക്കറ്റും നേടി.

ഡൽഹിക്കായി അശുതോഷ് ശർമ്മ, ട്രിസ്റ്റൺ സ്റ്റബ്സ് എന്നിവർ മാത്രമാണ് ഡൽഹി നിരയിൽ പിടിച്ചു നിന്നത്. ഇരുവരും 41 റൺസാണ് നേടിയത്. രണ്ട് ഫോറുകളും മൂന്ന് സിക്സുകളും ഉൾപ്പെടെയാണ് അശുതോഷ് 41 റൺസ് നേടിയത്. നാല് ഫോറുകൾ അടങ്ങുന്നതായിരുന്നു സ്റ്റബ്സിന്റെ ഇന്നിംഗ്സ്. 

മെയ് എട്ടിന് പഞ്ചാബ് കിങ്സിനെതിരെയാണ് ഡൽഹിയുടെ അടുത്ത മത്സരം. മെയ് 10ന് നടക്കുന്ന മത്സരത്തിൽ കൊൽക്കത്ത നൈറ്റ് റൈഡേഴ്‌സാണ് പാറ്റ് കമ്മിൻസിന്റെയും എതിരാളികൾ. 

IPL match between Delhi Capitals and Sunrisers Hyderabad abandoned due to rain