കോട്ടയം: വിൽക്കാൻ കൊണ്ടുവന്ന എം.ഡി.എം.എയുമായി പിടിയിലായ രണ്ടുപേരിൽ ഒരാളെ പണം വാങ്ങിയശേഷം കേസിൽ പ്രതിയാക്കാതെ പൊലിസ് രക്ഷപ്പെടുത്തിയെന്ന് ആക്ഷേപം. 11.9 ഗ്രാം എം.ഡി.എം.എ പിടിച്ചെടുത്ത കേസിലാണ് കൊലക്കേസ് പ്രതിയും നഗരത്തിലെ ഗുണ്ടാ നേതാവും ബ്ലേഡ് പണമിടപാടുകാരനുമായ യുവാവിനെ കേസെടുക്കാതെ പൊലിസ് വിട്ടയച്ചത്. ഒപ്പമുണ്ടായിരുന്ന ആളെ മാത്രം പ്രതിയാക്കി അറസ്റ്റ് രേഖപ്പെടുത്തി കോടതിയിൽ ഹാജരാക്കി റിമാൻഡ് ചെയ്തു.  സംഭവം പുറത്തായതോടെ സംസ്ഥാന പൊലിസ് ഉപമേധാവി (ഇന്റലിജൻസ്) അടിയന്തര അന്വേഷണത്തിന് നിർദേശം നൽകി.  കഴിഞ്ഞ ബുധനാഴ്ച രാത്രി കോട്ടയം തിരുവാതുക്കൽ പാറേച്ചാൽ ബൈപാസിലാണ് സംഭവം. ജില്ലാ പൊലിസ് മേധാവിയുടെ ഡാൻസാഫ് സംഘത്തിലെ ഉദ്യോഗസ്ഥർക്ക് സംശയം തോന്നി നിർത്തിയിട്ടിരുന്ന കാർ പരിശോധിക്കാൻ ശ്രമിച്ചതോടെ ഇതിലുണ്ടായിരുന്ന രണ്ടുയുവാക്കൾ ഇറങ്ങിയോടി.

ഇവരെ പിടികൂടി നടത്തിയ ദേഹ പരിശോധനയിലാണ് വിൽപനക്കായി എത്തിച്ച 11.9 ഗ്രാം എം.ഡി.എം.എ കണ്ടെടുത്തത്. തുടർന്ന് പ്രതികളെ കോട്ടയത്തെ പൊലിസ് സ്റ്റേഷനിലേക്ക് കൊണ്ടുവന്നു. ഇതിന് ശേഷമാണത്രേ കേസിൽ നിന്നൊഴിവാക്കാനുള്ള ഇടപാടുകൾ നടന്നത്.