തിരുനാവായ: സബ് ഇന്‍സ്‌പെക്ടര്‍ ഓഫ് പൊലിസ് (എസ്.ഐ) പി.എസ്.സി റാങ്ക് ലിസ്റ്റ് കാലാവധി ഒരു മാസത്തിനകം തീരുമ്പോള്‍ നിയമന ശുപാര്‍ശ നടന്നത് എട്ട് ശതമാനം മാത്രം. 2024 ജൂണ്‍ ഏഴിനു നിലവില്‍ വന്ന റാങ്ക് ലിസ്റ്റിന്റെ കാലാവധി അടുത്തമാസം ആറിന് അവസാനിക്കുകയാണ്. മെയിന്‍ ലിസ്റ്റില്‍ 694, സപ്ലിമെന്ററിയില്‍ 219, കോണ്‍സ്റ്റാബ്യൂലറി വിഭാഗത്തില്‍ 116, മിനിസ്റ്റിരിയല്‍ വിഭാഗം ലിസ്റ്റില്‍ ആറ് എന്നിങ്ങനെ 1,035 പേരാണു റാങ്ക് ലിസ്റ്റിലുള്ളത്. ഇതില്‍ 88 പേര്‍ക്കു മാത്രമാണ് നിയമന ശുപാര്‍ശ ലഭിച്ചത്. ഇതില്‍ 22 ഒഴിവും എന്‍.ജെ.ഡിയാണ്. അതിനാല്‍ യഥാര്‍ഥ നിയമനം 66 മാത്രം.
 
റാങ്ക് ലിസ്റ്റ് നിലവില്‍ വന്ന് 11 മാസം പിന്നിടുമ്പോള്‍ 66 ഒഴിവു മാത്രമാണ് വകുപ്പ് പി.എസ്.സിയില്‍ റിപ്പോര്‍ട്ട് ചെയ്തിട്ടുള്ളത്. മുന്‍ റാങ്ക് ലിസ്റ്റില്‍ നിന്ന് 608 പേര്‍ക്കു നിയമന ശുപാര്‍ശ ലഭിച്ചിരുന്നു. ഒഴിവുകള്‍ റിപ്പോര്‍ട്ട് ചെയ്യുന്നത് വലിയതോതില്‍ കുറയുമ്പോഴും സബ് ഇന്‍സ്‌പെക്ടര്‍ തസ്തികയുടെ പുതിയ റാങ്ക് ലിസ്റ്റ് പി.എസ്.സിയില്‍ തയാറാവുകയാണ്.

2023 ഡിസംബര്‍ 29നു പ്രസിദ്ധീകരിച്ച വിജ്ഞാപനത്തിന്റെ അടിസ്ഥാനത്തില്‍ പ്രിലിമിനറി, മെയിന്‍ പരീക്ഷകള്‍ പൂര്‍ത്തിയാക്കി ഷോര്‍ട് ലിസ്റ്റ് പ്രസിദ്ധീകരിച്ചിരിക്കുകയാണ്. ഈ മാസം ഒമ്പതോടെ ഇന്റര്‍വ്യൂ പൂര്‍ത്തിയാകും. റാങ്ക് ലിസ്റ്റ് ജൂണ്‍ ആറിന് പ്രസിദ്ധീകരിക്കും. ഈ ലിസ്റ്റിന് ശേഷം പുറത്തിറക്കാനുള്ള ലിസ്റ്റിലേക്കുള്ള വിജ്ഞാപനവും ഇറങ്ങിക്കഴിഞ്ഞു. കഴിഞ്ഞ ഡിസംബര്‍ 30ന് പ്രസിദ്ധീകരിച്ച വിജ്ഞാപന പ്രകാരം 1,84,313 പേരാണ് അപേക്ഷ നല്‍കിയത്. വിജ്ഞാപനവും പരീക്ഷയും മുറപോലെ നടക്കുന്നുണ്ടെങ്കിലും നിയമനം നാമമാത്രമാകുന്നതില്‍ ഉദ്യോഗാര്‍ഥികള്‍ നിരാശരാണ്.