നാദാപുരം: വെള്ളൂരില്‍ യൂത്ത്‌ലീഗ് പ്രവര്‍ത്തകന്‍ മുഹമ്മദ് അസ്‌ലമിനെ കാറിടിച്ചു വീഴ്ത്തി വെട്ടിക്കൊലപ്പെടുത്തിയ കേസില്‍ ഒരു സി.പി.എം പ്രവര്‍ത്തകനെ കൂടി അന്വേഷണ സംഘം അറസ്റ്റു ചെയ്തു. വെള്ളൂരിലെ പുത്തലത്ത് പി.ടി.കെ അഖില്‍ (26) ആണ് അറസ്റ്റിലായത്. അവധിദിനമായതിനാല്‍ ഇന്നലെ വൈകിട്ട് പ്രതിയെ നാദാപുരം ജുഡിഷ്യല്‍ ഫസ്റ്റ് ക്ലാസ് മജിസ്‌ട്രേട്ടിന്റെ വസതിയില്‍ ഹാജരാക്കി. പ്രതിയെ പതിനാലു ദിവസത്തേക്ക് റിമാന്‍ഡ് ചെയ്തു. സംഭവ ദിവസം കൊലയാളിസംഘം സഞ്ചരിച്ച ഇന്നോവ കാറില്‍ അഖിലും ഒപ്പം സഞ്ചരിക്കുകയും പ്രതികള്‍ക്കാവശ്യമായ സഹായങ്ങള്‍ ചെയ്തുകൊടുക്കുകയും ചെയ്തതായി പൊലിസ് പറഞ്ഞു.
ഇതോടെ സംഭവവുമായി ബന്ധപ്പെട്ട് അറസ്റ്റിലായവരുടെ എണ്ണം ആറായി. കൊലയില്‍ നേരിട്ട് പങ്കെടുത്തവരെയാണ് ഇനി പിടികൂടാനുള്ളത്. കാറില്‍ അകെ എട്ടുപേര്‍ ഉണ്ടായിരുന്നതായാണ് പൊലിസ് നല്‍കുന്ന സൂചന.