ലിസ്ബൺ: ഇതിഹാസ താരം ക്രിസ്റ്റ്യാനോ റൊണാൾഡോയുടെ മകൻ ക്രിസ്റ്റ്യാനോ ജൂനിയർ പോർച്ചുഗൽ അണ്ടർ 15 ടീമിൽ ഇടം നേടി. ഇതാദ്യമായാണ് റൊണാൾഡോ ജൂനിയർ പോർച്ചുഗൽ ടീമിൽ ഇടം നേടുന്നത്. ഈ മാസം വ്ലാറ്റ്കോ മാർക്കോവിച്ച് ടൂർണമെന്റിൽ ആണ് ക്രിസ്റ്റ്യാനോ ജൂനിയർ പോർച്ചുഗലിനായി ബൂട്ട് കെട്ടുക. ക്രൊയേഷ്യയിൽ ആണ് ടൂർണമെന്റ് നടക്കുന്നത്. 

മെയ് 13 മുതൽ 18 വരെയാണ് ടൂർണമെന്റ് നടക്കുന്നത്. പോർച്ചുഗൽ ജേഴ്സിയിൽ തന്റെ കഴിവ് തെളിയിക്കാനുള്ള സുവർണാവസരമാണ് റൊണാൾഡോ ജൂനിയറിന് ലഭിച്ചിരിക്കുന്നത്. ടൂർണമെന്റിൽ  ജപ്പാൻ, ഗ്രീസ്, ഇംഗ്ലണ്ട് എന്നീ ടീമുകളെയാണ് പോർച്ചുഗൽ നേരിടുക. റൊണാൾഡോയുടെ മകന് ഇതിനോടകം തന്നെ ഫുട്ബാളിൽ വലിയ ശ്രദ്ധ പിടിച്ചുപറ്റാൻ സാധിച്ചിട്ടുണ്ട്. സഊദി ക്ലബ് അൽ നസറിന്റെ യൂത്ത് ടീമിന് വേണ്ടിയാണ് താരം കളിക്കുന്നത്. ക്ലബ് തലത്തിലെ പോരാട്ടങ്ങൾ പോർച്ചുഗൽ ദേശിയ ടീമിനൊപ്പവും ആവർത്തിക്കാനാണ് താരം തയ്യാറെടുക്കുന്നത്.  

അതേസമയം റൊണാൾഡോ ഇപ്പോഴും ഫുട്ബോളിൽ പ്രായത്തെ പോലും തളർത്താത്ത പോരാട്ടവീര്യമാണ് നടത്തിക്കൊണ്ടിരിക്കുന്നത്. 2026 ഫിഫ ലോകകപ്പിൽ പോർച്ചുഗലിനായി കളിക്കുമോ എന്നാണ് ആരാധകർ ഉറ്റുനോക്കുന്നത്. 2026 ലോകകപ്പിന്റെ ഭാഗമാവാൻ റൊണാൾഡോക്ക് സാധിച്ചാൽ ആറ് ലോകകപ്പുകളിൽ കളിക്കുന്ന താരമായി മാറാനും റൊണാൾഡോക്ക് സാധിക്കും. 2006 ലോകകപ്പിൽ സെമി ഫൈനൽ വരെ മുന്നേറിയതാണ് പോർച്ചുഗലിന്റെ വേൾഡ് കപ്പിലെ ഏറ്റവും മികച്ച പ്രകടനം. തന്റെ കരിയറിൽ ഒരിക്കൽപോലും നേടാനാവാത്ത ലോകകപ്പ് സ്വന്തമാക്കാനുള്ള അവസാന അവസരം കൂടിയാണ് റൊണാൾഡോക്കുള്ളത്. 

അൽ നസറിന് വേണ്ടി റൊണാൾഡോ മിന്നും ഫോമിലാണ് കളിക്കുന്നത് ഓരോ മത്സരങ്ങൾ കഴിയുമ്പോഴും തന്റെ ബൂട്ടുകളിൽ നിന്നും ഗോൾ വേട്ട തുടർന്ന് കൊണ്ടിരിക്കുകയാണ് റൊണാൾഡോ. ഇതിനോടകം തന്നെ 934 ഗോളുകളാണ് സ്വന്തമാക്കിയിട്ടുള്ളത്. അൽ നസറിനായി സഊദി ലീഗിൽ ഈ സീസണിൽ 23 ഗോളുകളാണ് റൊണാൾഡോ അടിച്ചുകൂട്ടിയിരിക്കുന്നത്. നിലവിലെ ലീഗിലെ ഗോൾ വേട്ടക്കാരുടെ പട്ടികയിൽ ഒന്നാമതുള്ളതും റൊണാൾഡോ തന്നെയാണ്.

Cristiano Ronaldos son Cristiano Jr has been named in the Portugal Under-15 team