തിരുവനന്തപുരം: സ്വകാര്യ സൗന്ദര്യ ചികിത്സാ കേന്ദ്രത്തിൽ അടിവയറ്റിലെ കൊഴുപ്പ് നീക്കാനുള്ള ശസ്ത്രക്രിയയ്ക്ക് വിധേയയായ യുവതിക്ക് അണുബാധയേറ്റ് ഗുരുതരാവസ്ഥ; ഒൻപത് വിരലുകൾ മുറിച്ചുമാറ്റി. കഴക്കൂട്ടം അരശുംമൂട്ടിൽ പ്രവർത്തിക്കുന്ന 'കോസ്‌മെറ്റിക് ഹോസ്പിറ്റൽ' എന്ന സ്ഥാപനത്തിൽ നടന്ന ശസ്ത്രക്രിയയ്ക്ക് പിന്നാലെ സോഫ്റ്റ്‌വെയർ എൻജിനീയർ എം.എസ്. നീതു (31)വിനാണ് ഈ ദുരന്തം സംഭവിച്ചത്.

ഫെബ്രുവരി 22ന് നടത്തിയ ശസ്ത്രക്രിയയ്ക്ക് ശേഷം 23ന് ഡിസ്ചാർജ് ചെയ്ത നീതു, വീട്ടിലെത്തി അമിത ക്ഷീണം അനുഭവപ്പെട്ടതിനെ തുടർന്ന് ക്ലിനിക്കിലെ ഡോക്ടറെ ബന്ധപ്പെട്ടു. ഉപ്പിട്ട കഞ്ഞിയും വെള്ളവും കുടിക്കാൻ ഡോ. ഷെനാൾ ശശാങ്കൻ നിർദേശിച്ചു. എന്നാൽ, രാത്രിയോടെ അവസ്ഥ മോശമായതിനാൽ 24ന് വീണ്ടും ക്ലിനിക്കിൽ എത്തിച്ചു. രക്തസമ്മർദം കുറഞ്ഞെന്ന് പറഞ്ഞ ഡോക്ടർ, നീതുവിനെ സ്വകാര്യ ആശുപത്രിയിലേക്ക് മാറ്റി. അവിടെ ഹൃദയാഘാതം സംഭവിച്ചതായി അറിയിച്ച് തീവ്രപരിചരണ വിഭാഗത്തിൽ പ്രവേശിപ്പിച്ചു.

പരിശോധനയിൽ ആന്തരിക അവയവങ്ങളിൽ അണുബാധ കണ്ടെത്തി. 21 ദിവസം വെന്റിലേറ്ററിൽ കഴിയേണ്ടി വന്ന നീതു, ഡയാലിസിസിനും വിധേയയായി. ഇടതുകാലിലെ ആർട്ടറി ബ്ലോക്ക് മൂലം രക്തയോട്ടം കുറഞ്ഞ് പാദത്തിന്റെ ചലനശേഷി നഷ്ടമായി. ഇതിനോടകം ചികിത്സയ്ക്കായി 10 ലക്ഷം രൂപ ചെലവായതായി നീതുവിന്റെ ഭർത്താവ് പത്മജിത്ത് നൽകിയ പരാതിയിൽ പറയുന്നു.

നീതുവിന്റെ പരാതിയിൽ തുമ്പ പൊലീസ്, ഡോ. ഷെനാൾ ശശാങ്കനെ പ്രതിയാക്കി കേസ് രജിസ്റ്റർ ചെയ്തു. മെഡിക്കൽ എസ്റ്റാബ്ലിഷ്മെന്റ് ലൈസൻസ് ഇല്ലാത്തതിനാൽ സ്ഥാപനത്തിന് നോട്ടീസ് നൽകി അടപ്പിച്ചതായി കഴക്കൂട്ടം പൊലീസ് അറിയിച്ചു. കേസ് അന്വേഷിക്കാൻ മെഡിക്കൽ ബോർഡ് രൂപീകരിക്കണമെന്ന് ആവശ്യപ്പെട്ട് കഴക്കൂട്ടം അസി. കമ്മിഷണർ ജെ.കെ. ദിനിൽ ജില്ലാ മെഡിക്കൽ ഓഫിസർക്ക് കത്ത് നൽകി.