തിരുവനന്തപുരം: സംസ്ഥാനത്തെ പ്ലസ്ടു ഹയർ സെക്കണ്ടറി, വൊക്കേഷണൽ ഹയർ സെക്കണ്ടറി പരീക്ഷാഫലം മെയ് 21ന് പ്രഖ്യാപിക്കും. ഹയർ സെക്കണ്ടറി പരീക്ഷയുടെ മൂല്യനിർണയം പൂർത്തിയായതായി വിദ്യാഭ്യാസ മന്ത്രി വി. ശിവൻകുട്ടി അറിയിച്ചു. രണ്ടാം വർഷ പരീക്ഷയ്ക്ക് 4,44,707 വിദ്യാർഥികൾ രജിസ്റ്റർ ചെയ്തിരുന്നു. നിലവിൽ ടാബുലേഷൻ പ്രവർത്തനങ്ങൾ പുരോഗമിക്കുകയാണ്. മെയ് 14ന് ബോർഡ് മീറ്റിംഗ് ചേർന്ന ശേഷം മെയ് 21ന് ഫലം പ്രസിദ്ധീകരിക്കും.

ഒന്നാം വർഷ ഹയർ സെക്കണ്ടറി പരീക്ഷയുടെ മൂല്യനിർണയവും നടന്നുവരികയാണ്. 4,13,581 വിദ്യാർഥികൾ ഒന്നാം വർഷ പരീക്ഷയ്ക്ക് രജിസ്റ്റർ ചെയ്തിരുന്നു. ടാബുലേഷൻ പൂർത്തിയാക്കി ജൂൺ മാസത്തിൽ ഒന്നാം വർഷ ഫലം പ്രഖ്യാപിക്കുമെന്നും മന്ത്രി വ്യക്തമാക്കി.

പ്ലസ് വൺ പ്രവേശനം: ഓൺലൈൻ അപേക്ഷ മെയ് 14 മുതൽ

2025 മെയ് 14 മുതൽ പ്ലസ് വൺ പ്രവേശനത്തിനുള്ള ഓൺലൈൻ അപേക്ഷകൾ സമർപ്പിക്കാം. വിദ്യാർഥികൾക്ക് സ്വന്തമായോ, പത്താം തരം പഠിച്ച സ്കൂളിലെ കമ്പ്യൂട്ടർ ലാബ്, അധ്യാപകരുടെ സഹായം, അല്ലെങ്കിൽ സമീപത്തെ ഗവൺമെന്റ്/എയ്ഡഡ് ഹയർ സെക്കണ്ടറി സ്കൂളുകളിലെ സൗകര്യങ്ങൾ എന്നിവ ഉപയോഗിച്ച് അപേക്ഷ സമർപ്പിക്കാം. അപേക്ഷ സ്വീകരിക്കുന്ന അവസാന തീയതി മെയ് 20.

പ്ലസ് വൺ ഏകജാലക പ്രവേശന ഷെഡ്യൂൾ

ട്രയൽ അലോട്ട്മെന്റ്: മെയ് 24
ആദ്യ അലോട്ട്മെന്റ്: ജൂൺ 2
രണ്ടാം അലോട്ട്മെന്റ്: ജൂൺ 10
മൂന്നാം അലോട്ട്മെന്റ്: ജൂൺ 16

മുഖ്യ ഘട്ടത്തിലെ മൂന്ന് അലോട്ട്മെന്റുകൾ വഴി ഭൂരിഭാഗം സീറ്റുകളിലും പ്രവേശനം ഉറപ്പാക്കി 2025 ജൂൺ 18ന് പ്ലസ് വൺ ക്ലാസുകൾ ആരംഭിക്കുമെന്ന് മന്ത്രി അറിയിച്ചു.

Plus One admissions begin on May 14, with classes starting June 18. Plus Two results will be announced on May 21.