ന്യൂഡൽഹി: പഹൽഗാം ഭീകരാക്രമണത്തിന്റെ പശ്ചാത്തലത്തിൽ ഇന്ത്യയുടെ തിരിച്ചടിയെ ഭയന്ന് പാകിസ്താൻ. ഏത് നിമിഷവും ഇന്ത്യ ആക്രമണം നടത്തിയേക്കാമെന്ന ആശങ്കയിൽ പാക് സൈന്യം കടുത്ത പ്രതിസന്ധിയിലാണ്. കാലഹരണപ്പെട്ട ആയുധങ്ങൾ, വെടിക്കോപ്പുകളുടെ ക്ഷാമം, സാമ്പത്തിക പ്രതിസന്ധി എന്നിവയാണ് പാകിസ്താനെ വലയ്ക്കുന്നത്. ഒരു യുദ്ധം ഉണ്ടായാൽ വെറും നാലു ദിവസത്തേക്കുള്ള ശേഷി മാത്രമേ പാക് സൈന്യത്തിനുള്ളൂവെന്ന് ദേശീയ മാധ്യമങ്ങൾ റിപ്പോർട്ട് ചെയ്യുന്നു.

പാക് സൈന്യം പ്രധാനമായും ആശ്രയിക്കുന്നത് പഴകിയ ടൈപ്പ് 56 റൈഫിളുകളാണ്. നൈറ്റ്-വിഷൻ ഉപകരണങ്ങളും ആധുനിക ആയുധങ്ങളും ആവശ്യത്തിനില്ല. അതേസമയം, ഇന്ത്യൻ സേന ആധുനിക സിഗ് സോവർ റൈഫിളുകളും ഹെറോൺ ഡ്രോണുകളും ഉപയോഗിക്കുന്നു. 2023-24 സാമ്പത്തിക വർഷത്തിൽ പാകിസ്താൻ പ്രതിരോധ ബജറ്റിൽ 15 ശതമാനം വെട്ടിക്കുറച്ചു. ജൂനിയർ ഓഫീസർമാർക്ക് 3 മുതൽ 6 മാസം വരെ ശമ്പളം വൈകുന്നു. ചില സൈനിക യൂണിറ്റുകൾ അടിസ്ഥാന ആവശ്യങ്ങൾക്കായി ക്രൗഡ് ഫണ്ടിംഗ് നടത്തുന്നുണ്ട്.

2024-ൽ റാവൽപിണ്ടി കോർപ്സിൽ നിന്ന് ചോർന്ന മെമ്മോയിൽ, സിയാച്ചിനിലെ സൈനികർക്ക് ശൈത്യകാല ഉപകരണങ്ങളുടെ കടുത്ത ക്ഷാമം നേരിടുന്നതായി വ്യക്തമായി. എൽഒസിയിലെ ആർട്ടിലറി യൂണിറ്റുകൾക്ക് ഷെല്ലുകളുടെ 30 ശതമാനം മാത്രമേ സ്റ്റോക്കുള്ളൂ. ബങ്കറുകളും നിരീക്ഷണ പോസ്റ്റുകളും നവീകരിക്കാൻ ഫണ്ടില്ല. സൈനിക-ഗ്രേഡ് ഡ്രോണുകളുടെ അഭാവത്തിൽ സിവിലിയൻ സ്മാർട്ട്‌ഫോണുകൾ നിരീക്ഷണത്തിന് ഉപയോഗിക്കുന്നു.

യുക്രൈനും ഇസ്രയേലുമായുള്ള ആയുധ കച്ചവടം പാകിസ്ഥാന്റെ ആയുധ ശേഖരത്തെ ദുർബലമാക്കി. രാജ്യസുരക്ഷയെ അവഗണിച്ച് ആയുധങ്ങൾ വിറ്റഴിച്ചത് വലിയ തിരിച്ചടിയായി. ജെയ്‌ഷെ മുഹമ്മദ്, ലഷ്‌കർ-ഇ-തൊയ്ബ തുടങ്ങിയ തീവ്രവാദ സംഘടനകളെ ആശ്രയിക്കുന്നതിനെതിരെ മിഡ്-റാങ്ക് ഓഫീസർമാർ അതൃപ്തി പ്രകടിപ്പിക്കുന്നു. 2023-ലെ സായുധ സേനാ ആരോഗ്യ സർവേയിൽ, 25 ശതമാനം സൈനികർക്ക് പിടിഎസ്ഡി ലക്ഷണങ്ങളുണ്ടെന്നും, 2020 മുതൽ ആത്മഹത്യാ നിരക്ക് 40 ശതമാനം വർധിച്ചതായും കണ്ടെത്തി.

പാകിസ്താന്റെ സാമ്പത്തിക നയങ്ങളിലെ പാളിച്ചകൾ പ്രതിരോധ മേഖലയെ തകർത്തിരിക്കുകയാണ്. ഇന്ത്യയുമായുള്ള സംഘർഷം രൂക്ഷമായാൽ പാക് സൈന്യത്തിന് പിടിച്ചുനിൽക്കാൻ കഴിയില്ലെന്നാണ് വിലയിരുത്തൽ.