പോർച്ചുഗീസ് ഇതിഹാസ താരം ക്രിസ്റ്റ്യാനോ റൊണാൾഡോക്ക് എത്ര വയസ്സ് വരെ ഫുട്ബോൾ കളിക്കാൻ സാധിക്കുമെന്ന ചോദ്യത്തിന് മറുപടി നൽകിയിരിക്കുകയാണ് മുൻ സ്കോട്ടിഷ് താരം അലൻ ഹട്ടൻ. റൊണാൾഡോക്ക് ഇപ്പോഴും ഗോളുകൾ നേടാൻ സാധിക്കുമെന്നും 45 വയസ് വരെ റൊണാൾഡോക്ക് കളിക്കാൻ കഴിയുമെന്നുമാണ് അലൻ അഭിപ്രായപ്പെട്ടത്. ബോയ്ൽസ്പോർട്‌സിന് നൽകിയ അഭിമുഖത്തിലാണ് മുൻ സ്കോട്ടിഷ് താരം ഇക്കാര്യം പറഞ്ഞത്. 

''ക്രിസ്റ്റ്യാനോ റൊണാൾഡോയ്ക്ക് 45 വയസ് വരെ ഫുട്ബോൾ കളിക്കാൻ കഴിയും. ഇതിന് ഒരു പ്രശ്നവുമില്ല. ഫുട്ബോളിൽ ഈ കാലങ്ങളിൽ ഒരുപാട് മികച്ച താരങ്ങൾ ഉണ്ടെന്ന് എനിക്കറിയാം. അദ്ദേഹം ഓരോ ദിവസവും മികച്ചതാക്കാൻ ശ്രമിക്കുന്ന രീതികൾ നോക്കുകയാണെങ്കിൽ അദ്ദേഹത്തിന് ഇനിയും കളിക്കാതിരിക്കാൻ ഒരു കാരണവും മുന്നിലില്ല. അദ്ദേഹത്തിന് ഇപ്പോഴും ഗോളുകൾ നേടാൻ കഴിയും. അതിനാൽ അത് ചെയ്യാൻ കഴിയുന്നിടത്തോളം കാലം വരെ അദ്ദേഹം മുന്നോട്ട് പോകുമെന്ന് ഞാൻ കരുതുന്നു'' അലൻ ഹട്ടൻ പറഞ്ഞു. 

സഊദി ക്ലബ് അൽ നസറിന് വേണ്ടി ഇതിഹാസതാരം ക്രിസ്റ്റ്യാനോ റൊണാൾഡോ പ്രായത്തെ പോലും വെല്ലുന്ന പോരാട്ടവീര്യമാണ് നടത്തിക്കൊണ്ടിരിക്കുന്നത്. ഓരോ മത്സരങ്ങൾ കഴിയുമ്പോഴും തന്റെ ബൂട്ടുകളിൽ നിന്നും ഗോൾ വേട്ട തുടർന്ന് കൊണ്ടിരിക്കുകയാണ് റൊണാൾഡോ. ഈ സീസണിൽ സഊദി ലീഗിൽ ഗോൾ വേട്ടക്കാരുടെ പട്ടികയിൽ ഒന്നാം സ്ഥാനത്തുള്ളത് റൊണാൾഡോയാണ്. 23 ഗോളുകളാണ് റൊണാൾഡോ അൽ നസറിനായി നേടിയിട്ടുള്ളത്. 

നിലവിൽ സഊദി പ്രൊ ലീഗിൽ ഒന്നാം സ്ഥാനത്തുള്ളത് അൽ ഇത്തിഹാദ് ആണ്. 29 മത്സരങ്ങളിൽ നിന്നും 21 വിജയവും അഞ്ചു സമനിലയും മൂന്ന് തോൽവിയും അടക്കം 68 പോയിന്റാണ് അൽ ഇത്തിഹാദിന്റെ കൈവശമുള്ളത്. റൊണാൾഡോയുടെ അൽ നസർ 60 പോയിന്റുമായി മൂന്നാം സ്ഥാനത്തുമാണ്. 29 മത്സരങ്ങളിൽ നിന്നുമായി 18 ജയവും ആറ് സമനിലയും അഞ്ചു തോൽവിയുമാണ് അൽ നസറിന്റെ സമ്പാദ്യം. 

Cristiano Ronaldo will play football until he is 40 Former Scottish player