ഇസ്ലാമാബാദ്: ഇന്ത്യയെതിരെ നദീജല കരാർ വിഷയത്തിൽ കടുത്ത ഭീഷണി മുഴക്കിയ പാകിസ്ഥാൻ പീപ്പിൾസ് പാർട്ടി ചെയർമാൻ ബിലാവൽ ഭൂട്ടോ ഇപ്പോൾ സമാധാനത്തിന് തയ്യാറാണെന്ന നിലപാടിൽ. "സിന്ധുവിൽ രക്തം ഒഴുക്കും" എന്ന ബിലാവലിന്റെ പഴയ പ്രസ്താവനയും അതിനുശേഷം പ്രഖ്യാപിച്ച ഈ സമാധാന നിലപാടും തമ്മിലുള്ള ഭിന്നതക്കാണ് രാജ്യാന്തര ശ്രദ്ധ.

ഏപ്രിൽ 22ന് ജമ്മു കശ്മീരിലെ പഹല്‍ഗാമിൽ ലഷ്കർ ഭീകരർ നടത്തിയ ആക്രമണത്തിൽ 26 വിനോദസഞ്ചാരികൾ കൊല്ലപ്പെട്ടതിനെ തുടർന്ന് ഇന്ത്യ സിന്ധു നദീജല കരാറിൽ നിന്ന് പിന്മാറുമെന്ന് പ്രധാനമന്ത്രി പ്രഖ്യാപിച്ചിരുന്നു. ഇതിന്റെ പിന്നാലെയാണ് ബിലാവൽ ഭൂട്ടോ ഇന്ത്യക്കെതിരെ ഭീഷണി മുഴക്കിയത് — "ജലത്തിന് പകരം രക്തം ഒഴുക്കും" എന്നായിരുന്നു പ്രസ്താവന.

ഇപ്പോൾ, ബിലാവൽ ഭൂട്ടോ പാകിസ്ഥാൻ ദേശീയ അസംബ്ലിയിൽ നടത്തിയ പ്രസംഗത്തിൽ പുതിയ ഭാഷയിലാണ് സംസാരിച്ചത്: "ഇന്ത്യ സമാധാനത്തിനായി വരണമെന്ന് ആഗ്രഹിക്കുന്നുവെങ്കിൽ, അവർ തുറന്ന കൈകളോടെയും വസ്തുതകളോടെയും വരട്ടെ. കെട്ടിച്ചമച്ച വാദങ്ങൾ ഒഴികെ, നാം അയൽക്കാരായി ഇരുന്നു സത്യം സംസാരിക്കാം." എന്നാൽ, 'അവര്‍ അങ്ങനെ ചെയ്യുന്നില്ലെങ്കില്‍  "പാകിസ്ഥാൻ ജനത മുട്ടുകുത്തില്ല. ഞങ്ങൾ സംഘർഷം ഇഷ്ടപ്പെടുന്നതുകൊണ്ടല്ല, സ്വാതന്ത്ര്യത്തെ സ്നേഹിക്കുന്നതുകൊണ്ടാണ് പോരാടുന്നത്."

ബിലാവലിന്റെ നിലപാട് മാറ്റം ഏറെ വിമർശനങ്ങൾക്കും പരിഹാസങ്ങൾക്കും വഴിവെച്ചു. മുൻപ് ഭീഷണി മുഴക്കിയതിന് പിന്നാലെ ഇന്ത്യ ബിലാവലിന്റെ X (മുൻ ട്വിറ്റർ) അക്കൗണ്ട് സസ്പെൻഡ് ചെയ്യുകയും ചെയ്തിരുന്നു. അതേസമയം, സ്കൈ ന്യൂസിന് നൽകിയ അഭിമുഖത്തിൽ പാകിസ്ഥാൻ ഭീകരസംഘടനകളുമായി ബന്ധം നിലനിർത്തിയിരുന്നുവെന്ന് തുറന്നുപറഞ്ഞ ബിലാവൽ, അതിന്റെ ഫലമായി രാജ്യം വലിയ നഷ്ടങ്ങൾ അനുഭവിച്ചെന്നും സമ്മതിച്ചു.

ബിലാവലിന്റെ പുതിയ സമാധാന പ്രസ്താവനയിൽ ഇന്ത്യ ഔദ്യോഗിക പ്രതികരണം നൽകിയിട്ടില്ലെങ്കിലും, പാകിസ്ഥാന്റെ ഭീകര ബന്ധവും സ്ഥിരം നിലപാടുമില്ലായ്മയും രാജ്യാന്തര തലത്തിൽ വിമർശനമുന്നയിക്കാൻ കാരണമായിരിക്കുകയാണ്.