തൊടുപുഴ: ഇടുക്കിയിലെ സേനാപതിയിൽ   ആരോഗ്യവകുപ്പിൻ്റെ ഗുരുതര വീഴ്ച്ച.  ഗർഭിണിയായ സ്ത്രീക്ക് കാലഹരണപ്പെട്ട അയൺ ഫോളിക് ആസിഡ് ഗുളികകൾ നൽകിയത് ആരോഗ്യപ്രശ്നങ്ങൾക്കും ആശുപത്രിവാസത്തിനും കാരണമായി.

ചെറുകരയിൽ താമസിക്കുന്ന ശാലു ശരത്തിന് (24) ആരോഗ്യ വകുപ്പിൻ്റെ ആശാ വർക്കർ മുഖേന ലഭിച്ച മരുന്ന്. ഏകദേശം ഒരാഴ്ച മുൻപാണ് ഇവർക്ക് അയൺ ഫോളിക് ആസിഡ് ഗുളികകൾ നൽകിയത്. പിന്നീട്, രണ്ട് ദിവസത്തിനിടെ നാലു ഗുളികകൾ കഴിച്ചതിനു ശേഷം ശാലുവിന് ശാരീരിക അസ്വസ്ഥത അനുഭവപ്പെട്ടത്.

തുടർന്ന് മരുന്നിൻ്റെ സ്ട്രെപ്പുകൾ പരിശോധിച്ചപ്പോഴാണ് അതിൻ്റെ കാലാവധി 2023ൽ കഴിഞ്ഞതായി കണ്ടെത്തിയത്. 15 സ്ട്രിപ്പുകൾ മുഴുവനും കാലാവധി കഴിഞ്ഞതായിരുന്നു. ഉടൻ തന്നെ ശാലുവിനെ നെടുങ്കണ്ടത്തെ സ്വകാര്യ ആശുപത്രിയിൽ പ്രവേശിപ്പിച്ചു. നിലവിൽ അവരുടെ ആരോഗ്യസ്ഥിതിയിൽ കുഴപ്പമില്ലെന്ന് ആശുപത്രിവൃത്തങ്ങൾ അറിയിച്ചു.

സംഭവത്തെ തുടർന്ന് ശാലുവിൻ്റെ കുടുംബം ആരോഗ്യ വകുപ്പിനെതിരെ പരാതി നൽകി. ആരോഗ്യ വകുപ്പ് ഇടുക്കി ജില്ലാ ഓഫീസർ സംഭവത്തിൽ വിശദമായ അന്വേഷണം ആരംഭിച്ചതായി അറിയിച്ചു.

തികച്ചും ഗൗരവമുള്ള ഈ വീഴ്ച ഗര്ഭിണിയുടെയും ഭാവിയെയും അപകടത്തിലാക്കുന്ന തരത്തിലുള്ളതാണെന്ന് ആരോഗ്യ പ്രവർത്തകർ ചൂണ്ടിക്കാട്ടുന്നു. മരുന്ന് വിതരണം സംബന്ധിച്ച പരിശോധനകൾ അവർ ചെയ്യണമെന്നും ആവശ്യപ്പെട്ടു.