റിയാദ്: സഊദിയിൽ സർക്കാർ, സ്വകാര്യ, നോൺ പ്രോഫിറ്റ് മേഖലകളിലെ തൊഴിലാളികൾക്ക് നിർബന്ധിത തൊഴിൽ ഫിറ്റ്‌നസ് പരിശോധന ഏർപ്പെടുത്താൻ മാനവ വിഭവശേഷി, സാമൂഹിക വികസന മന്ത്രാലയം പദ്ധതിയിടുന്നു. പൊതു മെഡിക്കൽ പരിശോധന, പ്രത്യേക പരിശോധന, മനഃശാസ്ത്ര പരിശോധന എന്നിങ്ങനെ മൂന്ന് വിധത്തിൽ ഫിറ്റ്‌നസ്സ് പരിശോധിക്കാനാണ് നീക്കം. തൊഴിലിടങ്ങളിൽ വ്യക്തിഗത ആരോഗ്യം നിരീക്ഷിക്കുകയും തൊഴിൽ ആരോഗ്യം പ്രോത്സാഹിപ്പിക്കുന്നതിനും തൊഴിൽ സംബന്ധമായ അപകടങ്ങളും രോഗങ്ങളും കുറയ്ക്കുന്നതിനും രാജ്യത്ത് തൊഴിൽ അന്തരീക്ഷം മെച്ചപ്പെടുത്തുന്നതിനും ലക്ഷ്യമാക്കിയാണ് പുതിയ നീക്കം.

തൊഴിലാളികളുടെ ശാരീരികവും മാനസികവുമായ ക്ഷമത വർദ്ധിപ്പിക്കുക, സുരക്ഷിതമായും കാര്യക്ഷമമായും അവരുടെ കർത്തവ്യങ്ങൾ നിർവഹിക്കാനുള്ള കഴിവ് ഉറപ്പാക്കുക എന്നിവയും ഇതിൽ ഉൾപ്പെടുന്നു. ഫിറ്റ്‌നസ്സ് പരിശോധനയ്ക്ക് ശേഷം തൊഴിൽ യോഗ്യനല്ലെങ്കിൽ, തൊഴിലാളികൾക്ക് അവരുടെ തൊഴിൽ തുടരുന്നതിൽ നിന്ന് വിലക്കപ്പെടും, തുടർന്ന് തൊഴിലുടമ തൊഴിൽ മാറ്റുന്നതിന് ആവശ്യമായ നടപടികൾ സ്വീകരിക്കണം. 

ഫിറ്റ്‌നസ്സ് ഫലം ലഭിച്ച് 30 ദിവസത്തിനുള്ളിൽ പരിശോധനാ ഫലങ്ങളിൽ ഒബ്ജക്ഷൻ നൽകാൻ തൊഴിലാളിക്ക് അവകാശമുണ്ടാകും. എതിർപ്പുകൾ പരിഗണിക്കുന്നതിനായി തൊഴിൽ വൈദ്യത്തിലും അനുബന്ധ സ്പെഷ്യാലിറ്റികളിലുമുള്ള വിദഗ്ധരെ ഉൾപ്പെടുത്തി ഒരു സ്വതന്ത്ര അവലോകന സമിതി രൂപീകരിക്കും. ഈ സംഘം ഒബ്ജക്ഷൻ പരിശോധിച്ച് 15 ദിവസത്തിനുള്ളിൽ തീരുമാനം പുറപ്പെടുവിക്കും.

പ്രത്യേക ഫിറ്റ്‌നസ്സ് ടെസ്റ്റ് നിർബന്ധമാക്കും മുമ്പ് പൊതുജനങ്ങളുടെയും തൊഴിലുടമകളുടെയും അഭിപ്രായങ്ങളും നിർദേശങ്ങളും തേടി ഇസ്തിതല പബ്ലിക് സർവേ പ്ലാറ്റ്‌ഫോമിൽ മന്ത്രാലയം ദേശീയ തൊഴിൽ ഫിറ്റ്‌നസ് പരിശോധനകൾക്കായുള്ള അഭിപ്രായ സർവ്വെ ആരംഭിച്ചിട്ടുണ്ട്.

അതേസമയം, പ്രവാസികളിൽ അധിക പേരും മാനസിക സംഘർഷങ്ങളിൽ കൂടിയാണ് കടന്നു പോകുന്നതെന്ന പഠനം നേരത്തെ പുറത്ത് വന്നിട്ടുണ്ട്. ഈ സാഹചര്യത്തിൽ പുതിയ തീരുമാനം തൊഴിൽ മേഖലകളിൽ പ്രവാസി തൊഴിലാളികൾക്ക് തുടക്കത്തിൽ തിരിച്ചടിയായേക്കുമെന്ന് വിലയിരുത്തപ്പെടുന്നു.