കുവൈത്ത് സിറ്റി: സഹകരണ സംഘങ്ങളിലെ സാമ്പത്തിക കാര്യങ്ങളില്‍ അഴിമതി നടത്തിയ 208 പേര്‍ കുറ്റക്കാരെന്ന് കുവൈത്ത് സാമൂഹിക, കുടുംബ കാര്യ മന്ത്രാലയം. 

അഴിമതിക്കെതിരെ പോരാടുന്നതിനും സര്‍ക്കാരിന്റെ ഉത്തരവാദിത്തം ഉയര്‍ത്തിപ്പിടിക്കുന്നതിനുമുള്ള ഒരു സുപ്രധാന നീക്കത്തിന്റെ ഭാഗമായി കുവൈത്ത് സാമൂഹിക, കുടുംബ കാര്യ മന്ത്രാലയമാണ് കഴിഞ്ഞ ഒരു വര്‍ഷത്തിനിടെ സഹകരണ സംഘങ്ങളിലെ സാമ്പത്തികവും ഭരണപരവുമായ ചട്ടങ്ങള്‍ ലംഘിച്ച 208 പേര്‍ക്കെതിരെ നടപടി എടുത്തത്. സ്വദേശി പൗരന്മാരും പ്രവാസികളും ഉള്‍പ്പെടെ 208 പേരെ പബ്ലിക് പ്രോസിക്യൂഷന് റഫര്‍ ചെയ്തു.

ഇവരില്‍ 96 പേര്‍ കുവൈത്തി പൗരന്മാരും 112 പേര്‍ പ്രവാസികളുമാണ്. ഇവരില്‍ സഹകരണ സൊസൈറ്റി ബോര്‍ഡുകളിലെ അംഗങ്ങളും വിവിധ തസ്തികകളില്‍ ജോലി ചെയ്യുന്ന ജീവനക്കാരും ഉള്‍പ്പെടുന്നു. മന്ത്രി ഡോ. അംതാല്‍ അല്‍ ഹുവൈല പുറപ്പെടുവിച്ച നിര്‍ദ്ദേശം അനുസരിച്ചാണ് മന്ത്രാലയത്തിന്റെ നടപടി. 

പ്രാദേശിക മാധ്യമ റിപ്പോര്‍ട്ടുകള്‍ പ്രകാരം സര്‍ക്കാര്‍ നടപടികള്‍ പക്ഷപാതമില്ലാതെ നടപ്പിലാക്കുന്നുണ്ടെന്നും ദേശീയതയോ സ്ഥാനമോ പരിഗണിക്കാതെ നിയമനടപടി എല്ലാവര്‍ക്കും ഒരുപോലെ ബാധകമാണെന്നും മന്ത്രി പറഞ്ഞു. പൊതു, അര്‍ദ്ധ പൊതു സ്ഥാപനങ്ങളിലെ സുതാര്യതയും സത്യസന്ധതയും സംബന്ധിച്ച സര്‍ക്കാരിന്റെ ഉറച്ച നിലപാടിനെയാണ് ഈ സംഭവം അടിവരയിടുന്നത്.

ഇതിനുപുറമെ ഉത്തരവാദിത്തം നിറവേറ്റാത്ത നിരവധി ഉന്നത ഉദ്യോഗസ്ഥര്‍ക്കെതിരെ അന്വേഷണം ആരംഭിച്ചിട്ടുണ്ട്. ഇവര്‍ക്ക് വീഴ്ച സംഭവിച്ചു എന്നു കണ്ടെത്തിയാല്‍ കര്‍ശന നടപടി എടുക്കും.

The Kuwaiti Ministry of Social and Family Affairs announces the conviction of 208 individuals, including both locals and expatriates, involved in corruption within the country’s cooperative sector.