ന്യൂഡൽഹി: ഇന്ത്യയുടെ ശക്തമായ തിരിച്ചടിയിൽ പാകിസ്താൻ പതറിയതിന് പിന്നാലെ, പാക് ദേശീയ അസംബ്ലിയിൽ പൊട്ടിക്കരഞ്ഞു എംപി താഹിർ ഇഖ്ബാൽ. "പാകിസ്താനെ രക്ഷിക്കാൻ ഇനി ദൈവത്തിന് മാത്രമേ കഴിയൂ," എന്ന് പറഞ്ഞാണ് പാകിസ്താൻ മുസ്ലീം ലീഗ്-എൻ എംപിയും മുൻ സൈനിക മേജറുമായ താഹിർ ഇഖ്ബാൽ ആശങ്ക പ്രകടിപ്പിച്ചത്.

ഇന്ത്യയുടെ അപ്രതീക്ഷിതവും ശക്തവുമായ പ്രത്യാക്രമണത്തിൽ പാകിസ്താൻ പ്രതിരോധ സംവിധാനങ്ങൾ തകർന്നതാണ് നിലവിലെ പ്രതിസന്ധിക്ക് കാരണം. പാകിസ്താൻ, ജമ്മു കശ്മീർ, പഞ്ചാബ്, രാജസ്ഥാൻ, ഗുജറാത്ത് എന്നീ ഇന്ത്യൻ സംസ്ഥാനങ്ങളിലേക്ക് ഡ്രോണുകളും മിസൈലുകളും ഉപയോഗിച്ച് ആക്രമണം നടത്താൻ ശ്രമിച്ചിരുന്നു. എന്നാൽ, ഇന്ത്യ ഈ ആക്രമണ ശ്രമങ്ങളെല്ലാം വേരോടെ പിഴുതെറിഞ്ഞു. തുടർന്ന് ഇന്ത്യൻ സായുധ സേന പാകിസ്താന്റെ വ്യോമ പ്രതിരോധ റഡാറുകളും സംവിധാനങ്ങളും തകർത്തുകൊണ്ട് ശക്തമായ തിരിച്ചടി നൽകി.

ഇന്ത്യൻ പ്രതിരോധ മന്ത്രാലയം വ്യക്തമാക്കിയതനുസരിച്ച്, പാകിസ്ഥാന്റെ നിരവധി പ്രധാന സൈനിക കേന്ദ്രങ്ങളിലെ വ്യോമ പ്രതിരോധ സംവിധാനങ്ങൾ ഇന്ത്യൻ ആക്രമണത്തിൽ തകർന്നു. ഇതോടെ, പാകിസ്ഥാൻ സൈന്യവും സർക്കാരും ആശങ്കയിലാണ്. പാകിസ്ഥാന്റെ തീവ്രവാദ നീക്കങ്ങൾക്കെതിരെ ശക്തമായ നിലപാട് സ്വീകരിക്കുന്ന ഇന്ത്യ, ഓരോ ആക്രമണ ശ്രമവും പരാജയപ്പെടുത്തുന്നതോടൊപ്പം പ്രത്യാക്രമണവും ശക്തമാക്കിയിരിക്കുകയാണ്.

സോഷ്യൽ മീഡിയയിൽ വൈറലായ താഹിർ ഇഖ്ബാലിന്റെ കരച്ചിൽ വീഡിയോ പാകിസ്താന്റെ നിലവിലെ ദയനീയാവസ്ഥയാണ് വെളിവാക്കുന്നത്. പാകിസ്താനിലെ സാധാരണ ജനങ്ങൾ തീവ്രവാദ നിലപാടുകൾക്കെതിരെ വിയോജിപ്പ് പ്രകടിപ്പിക്കുന്നുണ്ടെന്നും റിപ്പോർട്ടുകൾ സൂചിപ്പിക്കുന്നു. മുൻ സൈനിക ഉദ്യോഗസ്ഥനായ താഹിർ ഇഖ്ബാൽ, പാകിസ്താൻ സൈന്യത്തിൽ മേജറായി സേവനമനുഷ്ഠിച്ച ശേഷം രാഷ്ട്രീയത്തിലേക്ക് കടന്നുവന്ന വ്യക്തിയാണ്.

നിലവിലെ സാഹചര്യത്തിൽ പാകിസ്താന് എങ്ങനെ മുന്നോട്ടുപോകാനാകുമെന്നതിനെക്കുറിച്ച് രാജ്യം ആശങ്കയിലാണ്. ഇന്ത്യയുടെ തുടർച്ചയായ പ്രത്യാക്രമണങ്ങൾ പാകിസ്താന്റെ തന്ത്രങ്ങളെ പൂർണമായും തകർത്തിരിക്കുകയാണ്.