തിരുവനന്തപുരം: സംസ്ഥാനത്ത് ഡോക്ടറുടെ കുറിപ്പടി ഇല്ലാതെ ആന്റിബയോട്ടിക്കുകൾ വിറ്റതിന് 450 ഫാർമസികളുടെ ലൈസൻസ് ആരോഗ്യ വകുപ്പ് സസ്‌പെൻഡ് ചെയ്തു. അഞ്ച് ഫാർമസികളുടെ ലൈസൻസ് പൂർണമായും റദ്ദ് ചെയ്തു. കേരള ആന്റി മൈക്രോബിയൽ റെസിസ്റ്റൻസ് സ്ട്രാറ്റജിക് ആക്ഷൻ പ്ലാൻ (കാർസാപ്) പ്രകാരം ആന്റിബയോട്ടിക്കുകളുടെ അമിത ഉപയോഗം തടയാൻ വരും ദിവസങ്ങളിൽ ശക്തമായ നടപടികൾ സ്വീകരിക്കുന്നതായി ആരോഗ്യ മന്ത്രി വീണാ ജോർജ് അറിയിച്ചു.

ഡോക്ടറുടെ പ്രിസ്ക്രിപ്ഷൻ ഇല്ലാതെ ആന്റിബയോട്ടിക്കുകൾ വിൽക്കുന്നത് തടയാൻ സർക്കാർ നിർദേശം കർശനമായി നടപ്പാക്കിയതായി മന്ത്രി വ്യക്തമാക്കി. ഇതിന്റെ ഫലമായി ആന്റിബയോട്ടിക്കുകളുടെ ഉപയോഗം 20-30% ആണ് കുറഞ്ഞത്. ഉപയോഗിക്കുന്നവയിൽ ഭീഷണി കുറഞ്ഞ ആന്റിബയോട്ടിക്കുകൾ മാത്രമാണെന്നും ഉറപ്പാക്കിയിട്ടുണ്ട്. മന്ത്രിയുടെ നേതൃത്വത്തിൽ നടന്ന എഎംആർ ഉന്നതതല യോഗം, പാൽ, ഇറച്ചി, മീൻ എന്നിവയിൽ ആന്റിബയോട്ടിക് അവശിഷ്ടങ്ങൾ കണ്ടെത്താൻ പരിശോധനകൾ ശക്തമാക്കാനും നിർദേശിച്ചു. കാലിത്തീറ്റ, കോഴിത്തീറ്റ എന്നിവയിലെ ആന്റിബയോട്ടിക് അളവ് കുറയ്ക്കാനും നടപടികൾ സ്വീകരിക്കും.

സംസ്ഥാനത്തെ എല്ലാ ആശുപത്രികളും ആന്റിബയോട്ടിക് സ്മാർട്ട് ആശുപത്രികളാക്കാൻ കളർ കോഡിംഗ് സംവിധാനം നടപ്പാക്കാൻ തീരുമാനിച്ചു. മൂന്ന് മാസത്തിനുള്ളിൽ ഇത് പൂർത്തിയാക്കണം. തദ്ദേശ സ്വയംഭരണ സ്ഥാപനങ്ങൾക്കായി ആന്റിബയോട്ടിക് സാക്ഷരത മാർഗരേഖ പുറത്തിറക്കും. ഈ മാർഗരേഖ അനുസരിച്ച് തദ്ദേശ സ്ഥാപനങ്ങൾ കളർ കോഡ് ചെയ്യും. മൈക്രോ പ്ലാൻ വഴി എല്ലാ തദ്ദേശ സ്ഥാപനങ്ങളും ആന്റിബയോട്ടിക് സ്മാർട്ടാക്കും.

ഇനിമുതൽ ആന്റിബയോട്ടിക്കുകൾ നീല കവറിൽ മാത്രം നൽകണമെന്ന് നിർബന്ധമാക്കി. എല്ലാ ആശുപത്രികളും ഫാർമസികളും ഇത് പാലിക്കണം. സ്വകാര്യ മേഖലയിലെ പ്രവർത്തനങ്ങൾ ഐഎംഎ, എപിഐ, ഐഎപി, സിഐഡിഎസ് തുടങ്ങിയ സംഘടനകളുടെ സഹായത്തോടെ ശക്തിപ്പെടുത്തും. 4 ലക്ഷത്തിലധികം വീടുകളിൽ ആരോഗ്യ പ്രവർത്തകർ നേരിട്ട് ബോധവൽക്കരണം നടത്തി. 2025 ഡിസംബറോടെ കേരളത്തെ ആന്റിബയോട്ടിക് സാക്ഷര സംസ്ഥാനമാക്കാൻ ലക്ഷ്യമിടുന്നു.

എറണാകുളം ജില്ല പുറത്തിറക്കിയ ഹബ് ആൻഡ് സ്പോക്ക് മാതൃകയിലുള്ള ആന്റിബയോഗ്രാം മറ്റ് ജില്ലകളിലും ഘട്ടംഘട്ടമായി നടപ്പാക്കാൻ മന്ത്രി നിർദേശിച്ചു. കോഴിക്കോട്ടെ എൻപ്രൗഡ് പദ്ധതി വഴി കാലഹരണപ്പെട്ട മരുന്നുകൾ ശാസ്ത്രീയമായി സംസ്കരിക്കുന്നത് സംസ്ഥാന വ്യാപകമാക്കും. 2018ൽ ഒരു എഎംആർ ലാബ് മാത്രമുണ്ടായിരുന്ന സംസ്ഥാനത്ത്, രണ്ട് വർഷം കൊണ്ട് എല്ലാ ജില്ലകളിലും എഎംആർ ലാബുകൾ സ്ഥാപിച്ചു. മാസം 10,000 സാമ്പിളുകൾ ഹബ് ആൻഡ് സ്പോക്ക് മാതൃകയിൽ പരിശോധിക്കുന്നു. 185 സ്പോക്ക് ആശുപത്രികളിൽ നിന്ന് കൾച്ചർ സാമ്പിളുകൾ ജില്ലാ ലാബുകളിൽ വിശകലനം ചെയ്യുന്നു.