അതിർത്തിയിൽ ഇന്ത്യൻ സൈനിക കേന്ദ്രങ്ങളെ ലക്ഷ്യമിട്ട് പാകിസ്താൻ നടത്തിയ ഡ്രോൺ, മിസൈൽ ആക്രമണ ശ്രമങ്ങൾക്കിടെ തന്ത്രപരമായി യാത്രാവിമാനങ്ങളെ പ്രതിരോധമായി ഉപയോഗിച്ചതായി ഇന്ത്യ. പാകിസ്താന്റെ ഭാഗത്തുനിന്നുണ്ടായ ഈ നടപടി അന്താരാഷ്ട്ര വ്യോമയാന നിയമങ്ങളുടെ ഗുരുതരമായ ലംഘനമാണെന്ന് ഇന്ത്യ ചൂണ്ടിക്കാണിക്കുന്നു. ഇതിനുള്ള വ്യക്തമായ തെളിവുകൾ തങ്ങളുടെ കൈവശമുണ്ടെന്നും അവ പുറത്തുവിട്ടതായും ഇന്ത്യൻ അധികൃതർ അറിയിച്ചു.

പാകിസ്താൻ നടത്തിയ ഡ്രോൺ ആക്രമണങ്ങളെ ഇന്ത്യൻ സൈന്യം വിജയകരമായി തടയുകയും ലക്ഷ്യസ്ഥാനങ്ങളിൽ എത്തുന്നതിനു മുൻപ് അവയെ വെടിവെച്ചിടുകയും ചെയ്തിരുന്നു. ഈ സംഭവങ്ങളുടെ പശ്ചാത്തലത്തിലാണ് പാകിസ്താനെതിരായ ഇന്ത്യയുടെ പുതിയ ആരോപണം. ആക്രമണ സമയത്ത് പാകിസ്താൻ തങ്ങളുടെ വ്യോമാതിർത്തി അടയ്ക്കാതെ യാത്രാവിമാനങ്ങൾക്ക് പറക്കാൻ അനുമതി നൽകിയതായി ഇന്ത്യ ആരോപിച്ചു. ഇന്ത്യൻ വ്യോമ പ്രതിരോധ സംവിധാനങ്ങളുടെ സ്വാഭാവികമായ തിരിച്ചടിയിൽ നിന്ന് രക്ഷ നേടുന്നതിനായി യാത്രാവിമാനങ്ങളെ ഒരു മറയായി ഉപയോഗിക്കുകയായിരുന്നു പാകിസ്താന്റെ ലക്ഷ്യമെന്ന് ഇന്ത്യ വ്യക്തമാക്കുന്നു.

പാകിസ്താന്റെ ഈ നീക്കം അന്താരാഷ്ട്ര വ്യോമയാന രംഗത്ത് വലിയ അപകടം സൃഷ്ടിക്കുന്നതാണെന്ന് ഇന്ത്യ ഗൗരവകരമായി ഉന്നയിച്ചു. സാധാരണയായി, ഇത്തരം സൈനിക നീക്കങ്ങൾ നടക്കുന്ന സമയങ്ങളിൽ പ്രത്യാക്രമണ സാധ്യത കണക്കിലെടുത്ത് രാജ്യങ്ങൾ തങ്ങളുടെ വ്യോമാതിർത്തി അടയ്ക്കാറുണ്ട്. എന്നാൽ, പാകിസ്താൻ ഇതിനു വിപരീതമായി യാത്രാവിമാനങ്ങൾക്ക് പറക്കാൻ അനുമതി നൽകിയത് മനഃപൂർവമാണെന്നും ഇത് നിരപരാധികളായ യാത്രക്കാരുടെ ജീവന് ഭീഷണിയാണെന്നും ഇന്ത്യ ആരോപിച്ചു.

പാകിസ്താന്റെ പ്രകോപനപരമായ നടപടിയുണ്ടായിട്ടും, യാത്രാവിമാനങ്ങളുടെ സുരക്ഷ കണക്കിലെടുത്ത് ഇന്ത്യൻ വ്യോമസേന അതീവ സംയമനം പാലിച്ചതായി അധികൃതർ അറിയിച്ചു. അന്താരാഷ്ട്ര വ്യോമയാന നിയമങ്ങൾ ലംഘിച്ചുകൊണ്ടുള്ള പാകിസ്താന്റെ ഈ പ്രവൃത്തിക്കെതിരെ ശക്തമായ അപലപനങ്ങൾ ഉയർന്നിട്ടുണ്ട്. യാത്രാവിമാനങ്ങളെ സൈനിക ലക്ഷ്യങ്ങൾക്കായി ഉപയോഗിക്കുന്നത് അന്താരാഷ്ട്ര സിവിൽ ഏവിയേഷൻ ഓർഗനൈസേഷന്റെ (ICAO) മാനദണ്ഡങ്ങൾക്ക് വിരുദ്ധമാണ്. പാകിസ്താന്റെ ഈ നടപടി അന്താരാഷ്ട്ര തലത്തിൽ ഉചിതമായ രീതിയിൽ ചോദ്യം ചെയ്യപ്പെടേണ്ടതാണെന്നും ഇന്ത്യ ആവശ്യപ്പെട്ടു.