ന്യൂഡൽഹി: എ.എൻ.ഐ വാർത്താ ഏജൻസി നൽകിയ അപകീർത്തി കേസിൽ വിക്കിപീഡിയക്ക് സുപ്രിംകോടതിയിൽനിന്ന് ആശ്വാസം. എ.എൻ.ഐയെക്കുറിച്ചുള്ള വിക്കിപീഡിയ ലേഖനം നീക്കംചെയ്യണമെന്ന ഡൽഹി ഹൈക്കോടതി ഉത്തരവ് സുപ്രിംകോടതി റദ്ദാക്കി. മാധ്യമങ്ങൾ എന്ത് പ്രസിദ്ധീകരിക്കണമെന്നോ എന്ത് ഒഴിവാക്കണമെന്നോ നിർദേശിക്കേണ്ടത് കോടതിയുടെ ചുമതലയല്ലെന്ന് ജസ്റ്റിസ് അഭയ് എസ്. ഓക്ക, ജസ്റ്റിസ് ഉജ്ജൽ ഭൂയാൻ എന്നിവർ അടങ്ങിയ ബെഞ്ച് വ്യക്തമാക്കി.

കോടതി നടപടികൾ റിപ്പോർട്ട് ചെയ്യുന്നതിൽനിന്ന് മാധ്യമങ്ങളെ തടയാനാകില്ലെന്നും കോടതിയും മാധ്യമങ്ങളും ജനാധിപത്യത്തിന്റെ തൂണുകളാണെന്നും ബെഞ്ച് നിരീക്ഷിച്ചു. ഒരു ലിബറൽ ജനാധിപത്യ രാജ്യത്ത് ഇവ പരസ്പരം പൂരകമായിരിക്കണം. പൊതുസ്ഥാപനമെന്ന നിലയിൽ കോടതികൾ പൊതുജന സംവാദത്തിന് തുറന്നതായിരിക്കണമെന്നും, കോടതിയുടെ പരിഗണനയിലുള്ള വിഷയങ്ങളിൽ പോലും മാധ്യമങ്ങൾക്കും പൊതുജനങ്ങൾക്കും ചർച്ച നടത്താമെന്നും കോടതി വ്യക്തമാക്കി.

നേരത്തെ, എ.എൻ.ഐയെ ‘രഹസ്യാന്വേഷണ ഏജൻസിയുടെ കളിപ്പാവ’യെന്നും ‘സർക്കാരിന്റെ പിടിവള്ളി’യെന്നും വിശേഷിപ്പിച്ചതിനെതിരെ ഡൽഹി ഹൈക്കോടതി വിക്കിപീഡിയക്കെതിരെ കടുത്ത പരാമർശങ്ങൾ നടത്തിയിരുന്നു. ‘ഇന്ത്യ ഇഷ്ടമല്ലെങ്കിൽ ഇവിടെ ജോലി ചെയ്യേണ്ട’ എന്നും ഹൈക്കോടതി പറഞ്ഞിരുന്നു. 2024 ഒക്ടോബറിൽ, എ.എൻ.ഐ ഫയൽ ചെയ്ത മാനനഷ്ടക്കേസിന്റെ വിശദാംശങ്ങൾ ഉൾക്കൊള്ളുന്ന വിക്കിപീഡിയ പേജ് നീക്കാൻ ഹൈക്കോടതി ഉത്തരവിട്ടിരുന്നു.

ഈ ഉത്തരവിനെതിരെ വിക്കിപീഡിയയുടെ മാതൃസ്ഥാപനമായ വിക്കിമീഡിയ ഫൗണ്ടേഷൻ നൽകിയ ഹരജിയാണ് സുപ്രിംകോടതി പരിഗണിച്ചത്. എ.എൻ.ഐയെ ‘നരേന്ദ്ര മോദി സർക്കാരിന്റെ പ്രചാരണ ഉപകരണം’ എന്നും ‘വ്യാജ വാർത്തകൾക്ക് വിമർശനം നേരിട്ടവർ’ എന്നും വിശേഷിപ്പിച്ച വിക്കിപീഡിയ ലേഖനമാണ് എ.എൻ.ഐയെ പ്രകോപിപ്പിച്ചത്. മോദി സർക്കാരിനെ പിന്തുണയ്ക്കുകയും പ്രതിപക്ഷത്തിനെതിരെ പക്ഷപാതപരമായ വാർത്തകൾ നൽകുകയും ചെയ്യുന്നുവെന്ന് ഉദാഹരണങ്ങളോടെ ലേഖനം ചൂണ്ടിക്കാട്ടിയിരുന്നു.

ഹൈക്കോടതി നിർദേശപ്രകാരം 2024 ഒക്ടോബറിൽ വിക്കിപീഡിയ പേജ് പിൻവലിച്ചിരുന്നെങ്കിലും, സുപ്രിംകോടതിയുടെ ഇടപെടലോടെ വിക്കിപീഡിയക്ക് ആശ്വാസം ലഭിച്ചു. ഡൽഹി ഹൈക്കോടതിയുടെ നടപടി ന്യായീകരിക്കാനാകില്ലെന്നും സുപ്രിംകോടതി വിലയിരുത്തി.