കണ്ണൂര്‍: തെരുവ്‌നായ്ക്കളുടെ ശല്യം എന്നും വാര്‍ത്തയാവാറുണ്ട്. പുറത്തിറങ്ങി നടക്കുമ്പോള്‍ നാടൊട്ടാകെ പരക്കം പാഞ്ഞു നടക്കുന്ന നായ്ക്കളെ പേടിക്കണം. ഇപ്പോള്‍ ഇരുട്ടിന്റെ മറവില്‍ ചെയ്തിരിക്കുന്നത് അതൊന്നുമല്ല. ആളെ ഉപദ്രവിച്ചല്ല ചെയ്തിരിക്കുന്നത്. കാറാണ് ലക്ഷ്യമിട്ടത്. അതും കണ്ണൂര്‍ ഡെപ്യൂട്ടി കലക്ടറുടെ ഔദ്യോഗിക വാഹനം. കാറിന്റെ ബമ്പറിന്റെ ഭാഗവും മഡ്ഗാര്‍ഡും നെയിംപ്ലേറ്റും കടിച്ചുകുടഞ്ഞെടുത്ത് ഇഞ്ചപ്പരുവമാക്കിയിട്ടുണ്ട്.

കലക്ടറേറ്റ് കെട്ടിടസമുച്ചയത്തില്‍ വാഹനങ്ങള്‍ പാര്‍ക്ക് ചെയ്യുന്ന സ്ഥലത്ത് നിര്‍ത്തിയിട്ടതായിരുന്നു കാര്‍. വെള്ളിയാഴ്ച പുലര്‍ച്ചെയാണ് സംഭവമെന്നാണ് കരുതുന്നത്. കാറിനടിയില്‍ പൂച്ചയോ മറ്റോ പതുങ്ങിയതു കൊണ്ടാവാം നായ്ക്കളെ പ്രകോപിപ്പിച്ചതെന്നാണ് നിഗമനം. മനുഷ്യരെ ആക്രമിക്കുന്ന നായ്ക്കള്‍ ഇപ്പോള്‍ ഭരണസിരാകേന്ദ്രങ്ങളിലാണ് അക്രമം നടത്തുന്നത്.