ന്യൂഡൽഹി: പാകിസ്ഥാന്റെ തീവ്രവാദ ലോഞ്ച് പാഡുകൾക്കെതിരെ ഇന്ത്യൻ സൈന്യം നടത്തിയ ശക്തമായ തിരിച്ചടിയിൽ, 1999ലെ കാണ്ഡഹാർ വിമാന റാഞ്ചലിൽ പങ്കാളികളായവർ ഉൾപ്പെടെ നിരവധി ഭീകരവാദികൾ കൊല്ലപ്പെട്ടതായി റിപ്പോർട്ട്. ഓപ്പറേഷൻ സിന്ദൂർ ആക്രമണത്തിൽ, നിയന്ത്രണ രേഖയ്ക്ക് സമീപമുള്ള തീവ്രവാദ ക്യാമ്പുകളും പാക് സൈനിക പോസ്റ്റുകളും ഇന്ത്യൻ സൈന്യം തകർത്തു.

ജെയ്ഷെ ബഹവാൽപൂർ ആസ്ഥാനമുൾപ്പെടെ ഒൻപത് ലക്ഷ്യസ്ഥാനങ്ങൾക്കെതിരെ നടത്തിയ കൃത്യമായ മിസൈൽ ആക്രമണങ്ങളിൽ, കാണ്ഡഹാർ ഹൈജാക്കിംഗിന്റെ സൂത്രധാരന്മാരിലൊരാളായ അബ്ദുൽ റൗഫ് അസ്ഹർ ഉൾപ്പെടെയുള്ള പ്രമുഖ ഭീകരവാദികൾ കൊല്ലപ്പെട്ടതായി സൈന്യം സ്ഥിരീകരിച്ചു.

പഹൽഗാം ഭീകരാക്രമണത്തിന് മറുപടിയായി നടത്തിയ ഈ പ്രത്യാക്രമണം, തീവ്രവാദത്തിനെതിരെയുള്ള ഇന്ത്യയുടെ ശക്തമായ നിലപാടിന്റെ ഭാഗമാണ്. പ്രതിരോധ മന്ത്രാലയം വൈകിട്ട് 6 മണിക്ക് നടത്തുന്ന വാർത്താ സമ്മേളനത്തിൽ കൂടുതൽ വിവരങ്ങൾ പുറത്തുവിടുമെന്ന് പ്രതീക്ഷിക്കുന്നു.