ദുബൈ: എട്ടാമത് ഹിസ്റ്റോറിക് ദൽമ റേസ് ഫെസ്റ്റിവൽ 2025 മെയ് 16 മുതൽ ജൂൺ 1 വരെ നടക്കും. അബൂദബിയിലെ അൽ ധാഫ്ര പ്രദേശത്ത് സ്ഥിതിചെയ്യുന്ന ദൽമ ദ്വീപിലാണ് ഈ മേള നടക്കുന്നത്. അബൂദബി ഹെറിറ്റേജ് അതോറിറ്റി, അബൂദബി മറൈൻ സ്പോർട്സ് ക്ലബ്, അബൂദബി സ്പോർട്സ് കൗൺസിൽ എന്നിവർ ചേർന്നാണ് ഈ മേള സംഘടിപ്പിക്കുന്നത്. 

60 അടി നീളമുള്ള പരമ്പരാഗത ബോട്ടുകൾക്കായുള്ള ചരിത്രപരമായ ദൽമ ഡൗ സെയ്ലിംഗ് റേസ് ആണ് ഫെസ്റ്റിവലിലെ പ്രധാന ആകർഷണം. ഇത് അറബിക്കടലിലെ ഏറ്റവും നീളമേറിയ പരമ്പരാഗത സെയ്ലിംഗ് റേസാണ്, 68 നോട്ടിക്കൽ മൈൽ (ഏകദേശം 125 കിലോമീറ്റർ) ആണ് റേസിന്റെ ദൈർഘ്യം. ദൽമ ദ്വീപിൽ നിന്ന് ആരംഭിക്കുന്ന റേസ് ഘാഷ, ഉം അൽ കുർകും, അൽ ഫത്തയർ, അൽ ബസം, അൽ ഫൈ, മറാവ, ജനാന എന്നീ ദ്വീപുകളിലൂടെ കടന്നുപോയി, അൽ മുഘൈറ സിറ്റി ബീച്ചിൽ വച്ച് അവസാനിക്കും. 

ഫെസ്റ്റിവൽ കാലയളവിൽ സന്ദർശകരെ ആകർഷിക്കുന്നതിനായി എല്ലാ വാരാന്ത്യങ്ങളിലും നിരവധി പരിപാടികൾ സംഘടിപ്പിക്കും. ഇത് ടൂറിസത്തെ പ്രോത്സാഹിപ്പിക്കുകയും ദൽമ ദ്വീപിലെ പ്രാദേശിക സമ്പദ് വ്യവസ്ഥയെ സഹായിക്കുകയും ചെയ്യുന്നു.

ദൽമ ഷാരി ഫിഷിംഗ് ചാമ്പ്യൻഷിപ്പ്, ദൽമ ട്രെഡിഷണൽ റോയിംഗ് റേസ്, സ്റ്റാൻഡ്-അപ്പ് പഡിൽബോർഡിംഗ് മത്സരങ്ങൾ, സൈക്ലിംഗ് മത്സരങ്ങൾ, ഡൊമിനോസ്, കാരം (പുരുഷന്മാർക്കും സ്ത്രീകൾക്കും) ടൂർണമെന്റുകൾ എന്നിവയെല്ലാം ഫെസ്റ്റിവലിന്റെ പ്രധാന ആകർഷണങ്ങളാണ്. 

ഫെസ്റ്റിവലിൽ സ്ഥാപിക്കുന്ന ഹെറിറ്റേജ് മാർക്കറ്റിൽ നിന്ന് സന്ദർശകർക്ക് എമിറാത്തി ക്രാഫ്റ്റുകളും പ്രാദേശിക വിഭവങ്ങളും വാങ്ങാനാകും. കുട്ടികൾക്കായി പ്രത്യേക മേഖലകളും തിയേറ്റർ പ്രകടനങ്ങളും ദൈനംദിന മത്സരങ്ങളും ഉണ്ടാകും. 

പ്രാദേശിക നാവിക പാരമ്പര്യത്തിന്റെ ആഘോഷമാണ് ഹിസ്റ്റോറിക് ഡൽമ റേസ് ഫെസ്റ്റിവൽ. യുഎഇയുടെ പൈതൃകം, നാവിക പാരമ്പര്യം എന്നിവ പുതുതലമുറയിലേക്ക് കൈമാറുന്നതിനും, പൊതുജനങ്ങൾക്ക് ഇതിനെ കുറിച്ച് അറിവ് പകരാനും ലക്ഷ്യമിട്ടാണ് മേള സംഘടിപ്പിക്കുന്നത്.

The 8th Historic Dalma Race Festival begins on May 16, 2025, in Abu Dhabi’s Al Dhafra region. Experience the longest traditional dhow race, cultural activities, heritage markets, and more. A celebration of UAE’s maritime legacy!