കൊച്ചി: സൈക്കിളിന്റെ പമ്പുകളിൽ കഞ്ചാവ് നിറച്ചുകൊണ്ട് കടത്താൻ ശ്രമിച്ച നാല് ഇതര സംസ്ഥാനക്കാർ പിടിയിൽ. സംഭവത്തിൽ പശ്ചിമ ബംഗാളിലെ മൂർഷിദാബാദ് സ്വദേശികളായ റാബി, സെയ്ഫുൽ ഷെയ്ഖ്, സിറാജുൽ മുൻഷി, റാഖിബുൽ മൊല്ല എന്നിവരാണ് പിടിയിലായത്. അങ്കമാലിയിൽ നിന്നാണ് ഈ നാല് ആളുകളെയും പൊലിസ് പിടികൂടിയത്. ജില്ല പൊലിസ് മേധാവി എം ഹേമലതക്ക് ലഭിച്ച രഹസ്യ വിവരത്തെ തുടർന്ന് നടത്തിയ പരിശോധനയിലാണ് ഇവർ പിടിയിലായത്. നെടുമ്പാശേരി എയർപോർട്ട് സിഗ്നൽ ജംഗ്ഷനിൽ വെച്ചാണ് പ്രതികളെ പൊലിസ് കസ്റ്റഡിയിൽ എടുത്തത്. 

200 സൈക്കിൾ പമ്പുകളിൽ കുത്തിനിറച്ച്  കൊണ്ടുവന്ന 24 കിലോ കഞ്ചാവാണ് ഇവരിൽ നിന്നും പിടികൂടിയത്. ഒഡീഷയിൽ നിന്നും കിലോക്ക് 2000 രൂപ നിരക്കിൽ വാങ്ങി ഇവിടെ എത്തിച്ചുകൊണ്ട് പത്തിരട്ടി തുകക്ക് കച്ചവടം നടത്താനായിരുന്നു ഇവരുടെ പദ്ധതി. കോയമ്പത്തൂരിൽ തീവണ്ടിയിൽ ഇറങ്ങിയതിന് ശേഷം ഇവർ അങ്കമാലിയിൽ എത്തുകയായിരുന്നു.  ഇവിടെ നിന്നും ഓട്ടോറിക്ഷയിൽ പോവുന്ന സമയത്തായിരുന്നു ഇവരെ പൊലിസ് പിടികൂടിയത്. 

Attempt to smuggle ganja through bicycle pumps Four non-state nationals arrested in Angamaly