വടകര: വടകരയില്‍ കാറും വാനും കൂട്ടിയിടിച്ച് നാലുപേര്‍ മരിച്ചു. മൂന്നു സ്ത്രീകളും ഒരു പുരുഷനുമാണ് അപകടത്തില്‍ മരിച്ചത്. പുന്നോല്‍ സ്വദേശികളായ റോജ, ജയവല്ലി, കുഞ്ഞിപ്പള്ളി സ്വദേശി രഞ്ജു, മാഹി സ്വദേശി ഷിഗിന്‍ലാല്‍ എന്നിവരാണ് അപകടത്തില്‍ മരിച്ചത്. 

വാനിലുണ്ടായിരുന്ന ഏഴു പേര്‍ക്ക് പരുക്കേറ്റു. ഇന്നു വൈകുന്നേരം 3.15ഓടെയാണ് അപകടം സംഭവിച്ചത്. ദേശീയപാതയില്‍ മൂരാട് പാലത്തിനു സമീപമാണ് അപകടമുണ്ടായത്. 

പയ്യോളി ഭാഗത്തേക്ക് പോകുകയായിരുന്ന കാറാണ് അപകടത്തില്‍പ്പെട്ടത്. കാറില്‍ കുട്ടി ഉള്‍പ്പെടെ ആറ് യാത്രക്കാരാണ് ഉണ്ടായിരുന്നത്. കാര്‍ വെട്ടിപ്പൊളിച്ചാണ് യാത്രക്കാരെ പുറത്തെടുത്തത്. വടകര ഭാഗത്തേക്ക് പോകുകയായിരുന്നു വാന്‍.

മൃതദേഹങ്ങള്‍ വടകര സഹകരണ ആശുപത്രിയില്‍. ഇന്‍ക്വസ്റ്റ് നടപടികള്‍ക്ക് ശേഷം മൃതദേഹം ജില്ലാ ആശുപത്രിയിലേക്ക് മാറ്റും. തുടര്‍ന്നാകും പോസ്റ്റ്‌മോര്‍ട്ടം നടപടികള്‍.

കാര്‍ പെട്രോള്‍ പമ്പില്‍ നിന്ന് ഇറങ്ങിവരുമ്പോള്‍ അമിതവേഗത്തില്‍ വരികയായിരുന്ന വാന്‍ ഇടിക്കുകയായിരുന്നെന്ന് ദൃക്‌സാക്ഷികള്‍ പറഞ്ഞു.