ജയ്പൂര്‍: രാജസ്ഥാനില്‍ ജയ്‌സാല്‍മീര്‍, ബാര്‍മിര്‍ ജില്ലകളില്‍ ഇന്ന് രാത്രി എട്ട് മുതല്‍ നാളെ രാവിലെ 6 മണിവരെ ബ്ലാക്ക് ഔട്ട് പ്രഖ്യാപിച്ചു. മുന്‍കരുതലിന്റെ ഭാഗമായാണ് ബ്ലാക്ക് ഔട്ട് പ്രഖ്യാപിച്ചതെന്ന് സര്‍ക്കാര്‍ വൃത്തങ്ങള്‍ അറിയിച്ചു. 

ബ്ലാക്ക് ഔട്ട് സമയത്ത് ജില്ലകളിലെ എല്ലാ താമസക്കാരും വീടുകളിലെ വിളക്കുകള്‍ ഓഫ് ചെയ്യണമെന്ന് നിര്‍ദേശമുണ്ട്. ഇരുചക്ര വാഹനങ്ങള്‍, മുച്ചക്ര വാഹനങ്ങള്‍, എന്നിവയുള്‍പ്പെടെ രാത്രി സഞ്ചാരം വിലക്കിയിട്ടുണ്ട്. 

പ്രതിരോധ മേഖലയ്ക്ക് ചുറ്റും 5 കിലോമീറ്റര്‍ പരിധിയില്‍ ബഫര്‍ സോണ്‍ പ്രഖ്യാപിച്ചിട്ടുണ്ട്, ഈ മേഖലയിലെ സംശയാസ്പദമായ പ്രവര്‍ത്തനങ്ങളോ വ്യക്തികളോ കര്‍ശനമായ നിയമനടപടികള്‍ക്ക് വിധേയമാക്കും. കൂടാതെ, ഡ്രോണുകളുടെ പ്രവര്‍ത്തനം പൂര്‍ണ്ണമായും നിരോധിച്ചിരിക്കുന്നു,  ജില്ലയിലുടനീളം പടക്കങ്ങളോ വെടിക്കെട്ടോ ഉപയോഗിക്കുന്നത് കര്‍ശനമായി നിരോധിച്ചിട്ടുണ്ട്.

സ്‌ഫോടക വസ്തുക്കള്‍ കണ്ടെത്തിയാല്‍ പൊലീസ് കണ്‍ട്രോള്‍ റൂമില്‍ അറിയിക്കണമെന്നും അതിനടുത്ത് പോകുകയോ ചിത്രങ്ങള്‍ എടുക്കുകയോ വീഡിയോകള്‍ റെക്കോര്‍ഡുചെയ്യുകയോ ചെയ്യരുതെന്നും നിര്‍ദ്ദേശങ്ങളില്‍ പറയുന്നു. പൊതുജനങ്ങള്‍ സംശയാസ്പദമായ വസ്തുവില്‍ നിന്ന് 100 മീറ്റര്‍ അകലം പാലിക്കാനും നിര്‍ദേശമുണ്ട്.

അതേസമയം വെടിനിര്‍ത്തല്‍ നിലവില്‍ വന്നതിന് പിന്നാലെ ഓപ്പറേഷന്‍ സിന്ദൂറിന്റെ വിജയം തെളിവുകള്‍ നിരത്തി വിശദീകരിച്ച് കര-വ്യോമ-നാവിക സേന ഉദ്യോഗസ്ഥര്‍ വാര്‍ത്തസമ്മേളനം നടത്തി. മേയ് 7 ന് ഇന്ത്യ നടത്തിയ തിരിച്ചടിയില്‍ ഒന്‍പത് ഭീകരകേന്ദ്രങ്ങളിലായി നൂറിലധികം ഭീകരര്‍ കൊല്ലപ്പെട്ടതായി ഡിജിഎംഒ ലഫ്റ്റനന്റ് ജനറല്‍ രാജീവ് ഘായ് പറഞ്ഞു. 

കാണ്ഡഹാര്‍ വിമാനം റാഞ്ചല്‍, പുല്‍വാമ സ്‌ഫോടനം എന്നിവയില്‍ പങ്കാളിത്തമുള്ള ഭീകരവാദികള്‍ കൊല്ലപ്പെട്ടതായാണ് കണ്ടെത്തല്‍. ഭീകരവാദത്തിന്റെ ആസൂത്രകരെയും, ഭീകര കേന്ദ്രങ്ങളെയും തകര്‍ക്കുക എന്ന ലക്ഷ്യത്തോടെയാണ് ഓപ്പറേഷന്‍ സിന്ദൂര്‍ ആസൂത്രണം നടത്തിയതെന്നും സൈന്യം അറിയിച്ചു.

blackout has been declared in Jaisalmer and Barmer districts of Rajasthan from 8 PM tonight to 6 AM tomorrow.