കൊച്ചി: ഐഎൻഎസ് വിക്രാന്തിന്റെ വിവരങ്ങൾ അന്വേഷിച്ച് കൊച്ചി നാവികസേനാ ആസ്ഥാനത്തേക്ക് വ്യാജ ഫോൺ കോൾ എത്തിയ സംഭവത്തിൽ ഒരാളെ പൊലിസ് കസ്റ്റഡിയിലെടുത്തു. സംഭവത്തിൽ കൊച്ചി ഹാർബർ പൊലിസ് അന്വേഷണം നടത്തിക്കൊണ്ടിരിക്കുകയാണ്.

കഴിഞ്ഞ ദിവസം 'രാഘവൻ' എന്ന പേരിൽ ഒരാൾ പ്രധാനമന്ത്രിയുടെ ഓഫീസിൽ നിന്നാണെന്ന് പറഞ്ഞു കൊണ്ട് നാവികസേനാ ആസ്ഥാനത്തേക്ക് ഫോൺ ചെയ്യുകയായിരുന്നു. ഐഎൻഎസ് വിക്രാന്തിന്റെ ലൊക്കേഷൻ അന്വേഷിച്ചായിരുന്നു ഫോൺ കോൾ എത്തിയത്. ഓപ്പറേഷൻ സിന്ദൂർ നടക്കുന്ന സമയത്ത് നടന്ന ഈ സംഭവം നാവികസേന അധികൃതർ ഗൗരവത്തോടെ കാണുകയും പൊലിസിനെ അറിയിക്കുകയും ചെയ്തു.

രണ്ട് ഫോൺ നമ്പറുകളിൽ ശ്രദ്ധ കേന്ദ്രീകരിച്ചായിരുന്നു പൊലിസ് പ്രധാനമായും അന്വേഷണം നടത്തിയത്. തുടർന്നാണ് പൊലിസ് ഒരാളെ കസ്റ്റഡിയിലെടുത്തത്. ഇയാളെ ചോദ്യം ചെയ്ത് വരുന്നുവെങ്കിലും, ഔദ്യോഗികമായി കസ്റ്റഡിയിലെടുത്തിട്ടില്ലെന്ന് പൊലിസ് വിശദീകരിച്ചു. കേസിന്റെ വിശദാംശങ്ങൾ വെളിപ്പെടുത്താതെ അന്വേഷണം തുടരുകയാണ്.

ഇന്ത്യൻ നാവികസേനയുടെ പ്രധാനപ്പെട്ട വിമാനവാഹിനിയായ ഐഎൻഎസ് വിക്രാന്തിന്റെ സുരക്ഷയും പ്രവർത്തനവുമായി ബന്ധപ്പെട്ട വിവരങ്ങൾ ലഭ്യമാക്കാൻ ശ്രമിച്ച ഈ സംഭവം ഗുരുതരമായ സുരക്ഷാ ഭീഷണിയായാണ് കണക്കാക്കപ്പെടുന്നത്.

A man has been taken into custody by Kochi police for allegedly making a fraudulent phone call to the naval headquarters, posing as an official from the Prime Minister's Office and seeking sensitive information about aircraft carrier INS Vikrant.