റാസല്‍ ഖൈമയില്‍ നടുറോഡില്‍ മൂന്ന് സ്ത്രീകള്‍ വെടിയേറ്റു മരിച്ചു. വാഹനം കടന്നുപോവുന്നതുമായി ബന്ധപ്പെട്ട തര്‍ക്കമാണ് കൊലപാതകത്തിലേക്ക് നയിച്ചതെന്നാണ് പൊലിസ് റിപ്പോര്‍ട്ട്. സംഭവത്തില്‍ പ്രതിയെ അറസ്റ്റ് ചെയ്തതായി റാസല്‍ഖൈമ പൊലിസ് അറിയിച്ചു. 

ജനവാസ മേഖലയില്‍ നടന്ന വെടിവെപ്പിന്റെ ഞെട്ടലിലാണ് പ്രദേശവാസികള്‍. ഇടുങ്ങിയ വഴിയിലൂടെ വാഹനം കടത്തി വിടുന്നതുമായി ബന്ധപ്പെട്ടാണ് സ്ത്രീകളും, പ്രതിയും തമ്മില്‍ തര്‍ക്കമുണ്ടായത്. തര്‍ക്കം രൂക്ഷമായതോടെ പ്രതി തോക്കെടുത്ത് സ്ത്രീകള്‍ക്ക് നേരെ വെടിവെക്കുകയായിരുന്നെന്ന് ദൃക്‌സാക്ഷികള്‍ പറഞ്ഞു. 

പരിക്കേറ്റ ഉടനെ മൂന്നുപേരെയും ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. പിന്നാലെ പൊലിസെത്തി പ്രതിയെ കീഴടക്കുകയും, നിയമനടപടികള്‍ക്കായി പബ്ലിക് പ്രോസിക്യൂഷന് കൈമാറുകയും ചെയ്‌തെന്ന് പൊലിസ് അറിയിച്ചു. 

സാമൂഹിക സുരക്ഷയ്ക്കും, ജനങ്ങളുടെ ജീവനും ഭീഷണി ഉയര്‍ത്തുന്നവര്‍ക്കെതിരെ കര്‍ശന നിയമനടപടികള്‍ സ്വീകരിക്കുമെന്നും റാസല്‍ഖൈമ പൊലിസ് മുന്നറിയിപ്പ് നല്‍കി.

three women lost life in a gun shoot in ras al khaima