തൃശൂര്‍: പാലിയേക്കര ടോള്‍ പ്ലാസയിലെ ജീവനക്കാരന് നേരെ ലോറി ഡ്രൈവറുടെ ക്രൂര മര്‍ദനം നടന്ന സംഭവത്തിന്റെ ദൃശ്യങ്ങള്‍ പുറത്ത്. ശനിയാഴ്ച രാത്രി 11.30 ഓടെയാണ് സംഭവം നടന്നത്. ടോള്‍ ബൂത്തില്‍ ജോലി ചെയ്യുന്ന ഉത്തര്‍പ്രദേശ് ഫൈസാബാദ് സ്വദേശി പപ്പു കുമാറാണ് ആക്രമണത്തിനിരയായത്.

തൃശൂര്‍ ഭാഗത്തുനിന്ന് വന്ന ടോറസ് ലോറിയുടെ ഫാസ്റ്റാഗ് റീഡാകാതിരുന്നതിനാല്‍ ഡ്രൈവറോട് വാഹനം മാറ്റിവെക്കാന്‍ ആവശ്യപ്പെട്ടപ്പോഴാണ് തര്‍ക്കം ആരംഭിച്ചത്. അതിനിടെ ഡ്രൈവർ ദേഷ്യപ്പെട്ട് ടോള്‍ ബൂത്തിലെക്കു അതിക്രമിച്ച് കയറി, ജീവനക്കാരനെ അസഭ്യം പറയുകയും ക്രൂരമായി മുഖത്തും കഴുത്തിലും മര്‍ദിക്കുകയും ചെയ്യുകയായിരുന്നു.

സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്നതോടെ സംഭവം വലിയ പ്രതിഷേധങ്ങൾക്ക് ഇടയാക്കി. ലോറിയിൽ നിന്ന് ഇറങ്ങി വരുന്ന ഡ്രൈവർ പപ്പു കുമാറിനെ നിരന്തരമായി മർദിക്കുന്നത് ദൃശ്യങ്ങളിൽ വ്യക്തമായി കാണാം. അടുത്തുള്ളവർ തടയാൻ ശ്രമിച്ചിട്ടും മർദനം തുടരുകയായിരുന്നു.

പരിക്കേറ്റ പപ്പു കുമാറിന്റെ പരാതിയെ അടിസ്ഥാനമാക്കി പുതുക്കാട് പൊലീസ് കേസെടുത്ത് അന്വേഷണം ആരംഭിച്ചു.ടോൾ പ്ലാസ ജീവനക്കാരനെ  ആക്രമിച്ച ചേർപ്പ് സ്വദേശിയായ ഡ്രൈവറെ പൊലീസ് കസ്റ്റഡിയിലെടുത്തു. സംഭവത്തെക്കുറിച്ചുള്ള വിശദമായ അന്വേഷണം തുടരുകയാണെന്ന് പൊലീസ് വ്യക്തമാക്കി.

A shocking incident occurred at Paliyekkara toll plaza in Thrissur where a lorry driver brutally assaulted toll booth employee Pappu Kumar from Uttar Pradesh. The attack happened around 11:30 PM on Saturday after the driver got angry over a Fastag scanning issue. The driver forcefully entered the booth, abused and physically assaulted the staff member. CCTV footage shows repeated attacks even as others tried to intervene. Police have arrested the accused, a native of Cherpu, following the victim's complaint.