ദുബ: നഴ്‌സുമാര്‍ക്ക് ഗോള്‍ഡന്‍ വിസ പ്രഖ്യാപിച്ച് ദുബൈ കിരീടാവകാശിയും ഉപപ്രധാനമന്ത്രിയും യുഎഇ പ്രതിരോധ മന്ത്രിയുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം. സമൂഹത്തിന് അവര്‍ നല്‍കിയ വിലമതിക്കാനാവാത്ത സംഭാവനകളെയും ആരോഗ്യ സേവനങ്ങളുടെ ഗുണനിലവാരം ഉയര്‍ത്തുന്നതില്‍ നല്‍കിയ നിര്‍ണായക പങ്കിനെയും അംഗീകരിക്കുക എന്നതാണ് ഇത്തരത്തിലുള്ള തീരുമാനത്തിന് പിന്നിലെന്ന് ഇന്നലെ പുറത്തിറങ്ങിയ പ്രഖ്യാപനത്തില്‍ പറയുന്നു. 

ആരോഗ്യസംരക്ഷണ സംവിധാനത്തില്‍ നഴ്‌സിങ് ജീവനക്കാര്‍ മുന്‍പന്തിയിലാണെന്നും ആരോഗ്യകരമായ ഒരു സമൂഹത്തെയും മെച്ചപ്പെട്ട ജീവിത നിലവാരത്തെയും കുറിച്ചുള്ള കാഴ്ചപ്പാട് സാക്ഷാത്കരിക്കുന്നതിലെ അനിവാര്യ പങ്കാളികളായി അവര്‍ വര്‍ത്തിക്കുമെന്നും കിരീടാവകാശി പ്രസ്താവനയില്‍ പറഞ്ഞു.

കിരീടാവകാശിയുടെ നിര്‍ദേശപ്രകാരം ദുബൈ ഹെല്‍ത്ത് സെക്ടറില്‍ ജോലി ചെയ്യുന്ന 15 വര്‍ഷത്തിലേറെ സേവനമനുഷ്ഠിച്ച നഴ്‌സുമാര്‍ക്ക് ഇനി ഗോള്‍ഡന്‍ വിസ നല്‍കും. രോഗി പരിചരണത്തിനായുള്ള അവരുടെ ദൈനംദിന സമര്‍പ്പണത്തെയും മറ്റുള്ളവരുടെ ക്ഷേമത്തിനായുള്ള പ്രതിബദ്ധതയെയും അദ്ദേഹം അഭിനന്ദിച്ചു.

മെയ് 12ന് അന്താരാഷ്ട്ര നഴ്‌സസ് ദിനത്തോട് അനുബന്ധിച്ചാണ് ഈ നിര്‍ദ്ദേശം. 

Sheikh Hamdan issued directives to grant golden visas to nursing staff employed with Dubai Health