മേപ്പാടി: 2009ൽ ഭൂമി നിരങ്ങി നീങ്ങൽ (സോയിൽ പൈപ്പിങ്) റിപ്പോർട്ട് ചെയ്ത മേപ്പാടി ഗ്രാമപഞ്ചായത്തിലെ 15ാം വാർഡായ കുന്ദമംഗലം വയലിലെ കുടുംബങ്ങൾ കുടിയിറക്ക് ഭീഷണിയിൽ. 25ഓളം കുടുംബങ്ങൾക്ക് അധികൃതർ ഭൂമി ഒഴിയാൻ നോട്ടിസ് നൽകി. മുണ്ടക്കൈ ചൂരൽമല ഉരുൾപൊട്ടൽ ദുരന്തത്തിന്റെ പശ്ചാത്തലത്തിലാണ് നോട്ടിസ് നൽകിയിരിക്കുന്നത്. 

2009ൽ പ്രദേശത്തെ എരുമക്കൊല്ലി ഫാത്തിമ ഫാം എസ്റ്റേറ്റിനോട് ചേർന്ന ജനവാസമേഖലയിലാണ് ഭൂമി നിരങ്ങിനീങ്ങൽ പ്രതിഭാസം റിപ്പോർട്ട് ചെയ്തത്. വിദഗ്ധ സംഘം നടത്തിയ പരിശോധനയിൽ പ്രദേശത്തെ ചില ഭാഗങ്ങൾ വാസയോഗ്യമല്ലെന്ന് കണ്ടെത്തി കുടുംബങ്ങളെ മാറ്റിപ്പാർപ്പിക്കാൻ നിർദേശിച്ചു. ഇവർക്കായി ഗ്രാമപഞ്ചായത്തിലെ രണ്ടാം വാർഡിൽ ഉൾപ്പെടുന്ന മുക്കം കുന്നിൽ ഭൂമി അനുവദിക്കുകയും ചെയ്തു. എന്നാൽ വീട് നിർമിച്ചുനൽകുകയോ  തുക അനുവദിക്കുകയോ ചെയ്തിരുന്നില്ല. ഇതോടെ കുടുംബങ്ങൾ വയലിൽ തന്നെ തുടർന്നു. ഇവരോടാണ് വീട് നിർമിച്ചുനൽകുകയോ തുക അനുവദിക്കുകയോ ചെയ്യാതെ ഭൂമി ഒഴിയാൻ ആവശ്യപ്പെട്ടിരിക്കുന്നത്. ഭൂമിമാത്രം നൽകിയാൽ എങ്ങനെ താമസിക്കുമെന്നാണ് കുടുംബങ്ങളുടെ ചോദ്യം. 

നിരവധി കുടുംബങ്ങൾ തിങ്ങിത്താമസിക്കുന്ന പ്രദേശമാണ് കുന്ദമംഗലം വയൽ. അപകട സാധ്യതയുള്ള പ്രദേശങ്ങളിൽ മുൻകരുതൽ സ്വീകരിക്കണമെന്നാണ് പ്രദേശവാസികൾ ആവശ്യപ്പെടുന്നത്. കുന്നിൻമുകളിൽ നിന്നുള്ള വെള്ളം സുരക്ഷിതമായി ഒഴുകി പോകാൻ സൗകര്യമൊരുക്കണമെന്നും കുടുംബങ്ങൾ ആവശ്യപ്പെട്ടു. ഭൂമി നിരങ്ങിനീങ്ങിയതോടെ പത്തിലേറെ വീടുകൾക്ക് വിള്ളൽ വീണു. റോഡുകൾ വിണ്ടുകീറി ഗതാഗത യോഗ്യമല്ലാതായി. ഭൂമിക്കടിയിലൂടെ ജലപ്രവാഹമുള്ളതിനാലാണ് ഇത്തരം പ്രതിഭാസമെന്നായിരുന്നു കണ്ടെത്തൽ. അതേസമയം കുടിയിറക്ക് ഭീഷണിയുമായി ബന്ധപ്പെട്ട് അടുത്തദിവസം തന്നെ യോഗം വിളിച്ചുചേർക്കാൻ ഗ്രാമപഞ്ചായത്ത് തീരുമാനിച്ചിട്ടുണ്ട്.

Threat of land grabbing in Meppadi 25 families served notices to vacate land