ശ്രീനഗര്‍: അതിര്‍ത്തി മേഖലകളില്‍ വീണ്ടും പാക് ഡ്രോണുകള്‍ കണ്ടെത്തിയെന്ന റിപ്പോര്‍ട്ടുകള്‍ക്ക് പിന്നാലെ ഏഴോളം നഗരങ്ങളിലേക്കുള്ള വിമാന സര്‍വിസുകള്‍ റദ്ദാക്കി എയര്‍ ഇന്ത്യയും ഇന്‍ഡിഗോയും. യാത്രക്കാരുടെ സുരക്ഷ കണക്കിലെടുത്താണ് തീരുമാനമെന്ന് അധികൃതര്‍ അറിയിച്ചു. 

ജമ്മു, ലേ, ജോധ്പൂര്‍, അമൃത്സര്‍, ഭുജ്, ജാംനഗര്‍, ചണ്ഡീഗഡ്, രാജ്‌കോട്ട് എന്നിവിടങ്ങളിലേക്കുള്ള വിമാന സര്‍വീസുകള്‍ റദ്ദാക്കിയതായി എയര്‍ ഇന്ത്യ അറിയിച്ചു.ജമ്മു, അമൃത്സര്‍, ചണ്ഡീഗഡ്, ലേ, ശ്രീനഗര്‍, രാജ്‌കോട്ട് എന്നിവിടങ്ങളിലേക്കുള്ള വിമാന സര്‍വിസുകളാണ് ഇന്‍ഡിഗോ റദ്ദാക്കിയിരിക്കുന്നത്.

'ഏറ്റവും പുതിയ സംഭവവികാസങ്ങളും നിങ്ങളുടെ സുരക്ഷയും കണക്കിലെടുത്ത്, മെയ് 13 ചൊവ്വാഴ്ച ജമ്മു, ലേ, ജോധ്പൂര്‍, അമൃത്സര്‍, ഭുജ്, ജാംനഗര്‍, ചണ്ഡീഗഡ്, രാജ്‌കോട്ട് എന്നിവിടങ്ങളിലേക്കുള്ള വിമാന സര്‍വിസുകള്‍ റദ്ദാക്കിയിരിക്കുന്നു. ഞങ്ങള്‍ സ്ഥിതിഗതികള്‍ നിരീക്ഷിച്ചുകൊണ്ടിരിക്കുകയാണ്, വിവിവരങ്ങള്‍ നിങ്ങളെ അറിയിക്കുന്നതായിരിക്കും' എയര്‍ ഇന്ത്യ ഔദ്യോഗിക എക്‌സ പേജില്‍ കുറിച്ചു. 

#TravelAdvisory
In view of the latest developments and keeping your safety in mind, flights to and from Jammu, Leh, Jodhpur, Amritsar, Bhuj, Jamnagar, Chandigarh and Rajkot are cancelled for Tuesday, 13th May.

We are monitoring the situation and will keep you updated.

For more…

— Air India (@airindia) May 12, 2025

'ഇത് നിങ്ങളുടെ യാത്രാ പദ്ധതികളെ എങ്ങനെ തടസ്സപ്പെടുത്തിയേക്കാമെന്ന് ഞങ്ങള്‍ മനസ്സിലാക്കുന്നു, അതുണ്ടാക്കുന്ന അസൗകര്യത്തില്‍ ഞങ്ങള്‍ ഖേദിക്കുന്നു. ഞങ്ങളുടെ ടീമുകള്‍ സ്ഥിതിഗതികള്‍ സജീവമായി നിരീക്ഷിച്ചുകൊണ്ടിരിക്കുകയാണ്, കൂടുതല്‍ അപ്ഡേറ്റുകള്‍ നിങ്ങളെ ഉടനടി അറിയിക്കുന്നതായിരിക്കും'- ഇന്‍ഡിഗോ പുറത്തു വിട്ട സന്ദേശം ഇതാണ്.

ഡ്രോണ്‍ കണ്ടെത്തിയ സാംബയില്‍ ഉള്‍പ്പെടെ സ്ഥിതി ശാന്തമാണെന്നാണ് റിപ്പോര്‍ട്ട്. അതേസമയം, വെടിനിര്‍ത്തല്‍ തുടരാന്‍ ഇന്ത്യ-പാക് സൈനിക ഡയറക്ടര്‍ ജനറല്‍മാര്‍ തമ്മിലുള്ള ചര്‍ച്ചയില്‍ ധാരണയായിട്ടുണ്ട്. അതിര്‍ത്തി പ്രദേശങ്ങളില്‍ സൈനികരെ കുറയ്ക്കുന്നതിലും ധാരണയായതായാണ് സൂചന. 

ഇരു രാജ്യങ്ങളും തമ്മില്‍ വെടിനിര്‍ത്തല്‍ പാലിക്കപ്പെടുന്നുവെന്ന് സൈന്യം അറിയിക്കുന്നു. ജമ്മുവിലുള്‍പ്പെടെ ഇന്നലെ വന്നത് നിരീക്ഷണ ഡ്രോണുകളാണെന്നും മറ്റുസംഭവങ്ങള്‍ ഒന്നും റിപ്പോര്‍ട്ട് ചെയ്തില്ലെന്നും സേന വ്യക്തമാക്കി.

Amid reports of suspected drone activity near border areas like Samba, Air India and IndiGo have cancelled multiple flights to cities including Jammu, Leh, Amritsar, and Chandigarh on May 13. Authorities cite passenger safety as the priority.