ന്യൂഡൽഹി: ജമ്മു കശ്മീരിലെ പഹൽഗാമിൽ നടന്ന ഭീകരാക്രമണത്തിന് പിന്നാലെ ഇന്ത്യയുടെ പ്രതികരണമായ ഓപ്പറേഷൻ സിന്ദൂർ രാജ്യാന്തര തലത്തിൽ രാഷ്ട്രീയ പ്രതികരണങ്ങൾക്ക് വഴിയൊരുക്കിയിട്ടുണ്ട്. പാകിസ്ഥാനോടൊപ്പം നിൽക്കുന്ന നിലപാട് സ്വീകരിച്ചതിനെ തുടർന്ന് തുർക്കിയെയും അസർബൈജാനെയും ഇന്ത്യക്കാർ വ്യാപകമായി ബഹിഷ്‌കരിക്കാൻ തുടങ്ങി.

സാമൂഹ്യമാധ്യമങ്ങളിൽ '#BoycottTurkey', '#BoycottAzerbaijan' തുടങ്ങിയ ഹാഷ്‌ടാഗുകൾ വലിയ പിന്തുണയോടെയാണ് പ്രചാരത്തിൽ വന്നത്. പ്രശസ്ത വ്യവസായികളും രാഷ്ട്രീയ നേതാക്കളും ഈ ബഹിഷ്കരണത്തിന് പിന്തുണ നൽകി രംഗത്തെത്തി.

തുർക്കി പാകിസ്ഥാനെ പിന്തുണച്ചതും, പാകിസ്ഥാൻ സൈന്യത്തിന് തുര്‍ക്കിഷ് സോംഗർ ഡ്രോണുകൾ നൽകി ഇന്ത്യയുടെ സൈനിക താവളങ്ങൾ ലക്ഷ്യമാക്കിയതും വ്യാപക പ്രതിഷേധത്തിന് ഇടയാക്കി. ഇതോടെ തുര്‍ക്കി ഉൽപ്പന്നങ്ങൾ, പ്രത്യേകിച്ച് തുര്‍ക്കി ആപ്പിളുകൾ, ഇന്ത്യൻ വിപണിയിൽ നിന്ന് മാറ്റണമെന്ന ആവശ്യം ശക്തമായി.

പൂനയിലെ ചില ആപ്പിൾ വ്യാപാരികൾ വ്യക്തമാക്കിയ നിലപാട് ഇതാണ്, "തുര്‍ക്കിയിൽ നിന്ന് ആപ്പിള്‍ വാങ്ങുന്നത് നിർത്തിയിരിക്കുകയാണ്, പകരം ഇന്ത്യയിലെ ഹിമാചലിൽ നിന്നും മറ്റ് പ്രദേശങ്ങളിൽ നിന്നുള്ള ഉത്പന്നങ്ങളെ പിന്തുണയ്ക്കുകയാണ്."

തുര്‍ക്കിയിലേക്കുള്ള ടൂറിസം, വിമാനസേവനങ്ങൾ, തുടങ്ങിയവയും ഇന്ത്യക്കാർ ഒഴിവാക്കുകയാണ്. ഗോവയിലെ ചില റിസോർട്ടുകൾ തുർക്കി പൗരന്മാർക്ക് താമസ സൗകര്യം നൽകുന്നതിൽ നിന്നും പിന്മാറിയതായി റിപ്പോർട്ടുകളുണ്ട്. ചിലർ തുർക്കിയെക്കാൾ ഗ്രീസിനെ മികച്ച യാത്രാ ലക്ഷ്യമായി തിരഞ്ഞെടുത്തിട്ടുണ്ട്.

അസർബൈജാനും പാകിസ്ഥാനോട് ഐക്യദാർഢ്യം പ്രഖ്യാപിച്ചതിനെ തുടർന്ന്, ഇന്ത്യക്കാർ അവരുടെ സേവനങ്ങളും ഉൽപ്പന്നങ്ങളും ഉപേക്ഷിക്കണം എന്ന ആവശ്യം ഉയരുന്നുണ്ട്.

വ്യാപാരിയായ ഹർഷ് ഗോയങ്ക എക്സിൽ  അഭിപ്രായപ്പെട്ടു:
"കഴിഞ്ഞ വർഷം തുര്‍ക്കിയിലും അസർബൈജാനിലുമുള്ള ടൂറിസത്തിലൂടെ ഇന്ത്യക്കാർ 4,000 കോടിയിലധികം രൂപ ചെലവഴിച്ചു. എന്നാൽ ഇപ്പോൾ അവർ ഭീകരതയെ പിന്തുണക്കുന്ന രാജ്യങ്ങളായി മാറിയിരിക്കുന്നു. ദയവായി ഈ രാജ്യങ്ങൾ ഒഴിവാക്കൂ. ഇന്ത്യയിലും ലോകത്തും അതിലേറെ മനോഹരമായ യാത്രാകേന്ദ്രങ്ങളുണ്ട്."