ന്യൂഡല്‍ഹി: കുട്ടികളും രോഗികളും സ്ത്രീകളും അടങ്ങുന്ന 43 റോഹിംഗ്യന്‍ അഭയാര്‍ഥികളെ കേന്ദ്ര സര്‍ക്കാര്‍ കടലിലേക്ക് ബലമായി തള്ളിവിട്ടെന്നാരോപിച്ച് സുപ്രിംകോടതിയില്‍ ഹരജി. കുടിയേറ്റക്കാരെന്ന് കണ്ടെത്തിയ കുട്ടികള്‍, സ്ത്രീകള്‍, വൃദ്ധര്‍, കാന്‍സര്‍ പോലുള്ള ഗുരുതരമായ ആരോഗ്യപ്രശ്‌നങ്ങളുള്ള വ്യക്തികള്‍ എന്നിവരുള്‍പ്പെടെയുള്ളവരെ മ്യാന്‍മറിലേക്ക് നാടുകടത്താന്‍ കടലില്‍ തള്ളിവിടുകയായിരുന്നുവെന്നാരോപിച്ചാണ് ഹരജി. കേസ് ജസ്റ്റിസുമാരായ സൂര്യകാന്ത്, ദീപങ്കര്‍ ദത്ത, ജസ്റ്റിസ് എന്‍. കോടീശ്വര്‍ സിങ് എന്നിവരടങ്ങിയ ബെഞ്ച് പരിഗണിക്കും.

സ്ത്രീകളും കുട്ടികളും ഉള്‍പ്പെടെ ഐക്യരാഷ്ട്രസഭയുടെ അഭയാര്‍ഥി ഹൈക്കമ്മിഷന്‍ കാര്‍ഡുകളുള്ള അഭയാര്‍ഥികളെ മെയ് 7ന് വൈകി പൊലിസ് അറസ്റ്റ് ചെയ്ത് നാടുകടത്തുകയായിരുന്നെന്ന് റോഹിംഗ്യകളുമായി ബന്ധപ്പെട്ട കേസ് പരിഗണിക്കുന്ന ബെഞ്ചിനെ അറിയിച്ചിരുന്നു. ഇക്കാര്യത്തില്‍ ഇടക്കാല ഉത്തരവുകളൊന്നും കോടതി പുറപ്പെടുവിച്ചിരുന്നില്ല. ബയോമെട്രിക് ഡാറ്റ ശേഖരിക്കുന്നതിന്റെ മറവില്‍ ഡല്‍ഹി പൊലിസ് ഇവരെ കസ്റ്റഡിയിലെടുക്കുകയും പോര്‍ട്ട് ബ്ലെയറിലേക്ക് കൊണ്ടുപോയി അവിടെവച്ച് കൈകളും കണ്ണുകളും കെട്ടി നാവിക കപ്പലുകളില്‍ ബലമായി കയറ്റുകയായിരുന്നെന്നും ഡല്‍ഹിയിലെ രണ്ട് അഭയാര്‍ഥികള്‍ സമര്‍പ്പിച്ച റിട്ട് ഹരജിയില്‍ ആരോപിച്ചു.

യാത്രയിലുടനീളം അവരുടെ കണ്ണും കൈകളും കെട്ടിയ നിലയിലായിരുന്നു. തുടര്‍ന്ന് അന്താരാഷ്ട്ര കടലതിര്‍ത്തിയിലേക്ക് തള്ളിയെന്നും ഹരജിയിലുണ്ട്. അവരുടെ കുടുംബങ്ങളുമായി ആശയവിനിമയം നടത്തിയ ഉദ്യോഗസ്ഥരോട് ജീവന് ഭീഷണിയുള്ളതിനാല്‍ മ്യാന്‍മറിലേക്ക് നാടുകടത്തരുതെന്നും പകരം ഇന്തോനേഷ്യയില്‍ വിടണമെന്നും അപേക്ഷിച്ചിരുന്നു. എന്നാല്‍, അധികാരികള്‍ അവരെ വഞ്ചിച്ച് ഇന്തോനേഷ്യയിലേക്ക് കൊണ്ടുപോകാന്‍ ആരെങ്കിലും എത്തുമെന്ന വ്യാജ ഉറപ്പില്‍ അന്താരാഷ്ട്ര ജലാശയത്തില്‍ ഉപേക്ഷിക്കുകയായിരുന്നു. ലൈഫ് ജാക്കറ്റുകള്‍ ഉപയോഗിച്ച് അടുത്തുള്ള ഒരു തീരത്തേക്ക് നീന്താന്‍ നിര്‍ബന്ധിതരാക്കിയെന്നും പിന്നീട് അവര്‍ മ്യാന്‍മറിലാണ് എത്തിയതെന്നും ഹരജിയിലുണ്ട്.