ഗസ്സ: യഹ്‌യ സിന്‍വാറിന്റെ സഹോദരനും ഹമാസ് നേതാവുമായ മുഹമ്മദ് സിന്‍വാറിനെ ലക്ഷ്യമിട്ട് ആക്രമണം നടത്തിയെന്ന് അവകാശപ്പെട്ട് ഇസ്‌റാഈല്‍ പ്രതിരോധ സേന. യൂറോപ്യന്‍ ആശുപത്രിയില്‍ ചൊവ്വാഴ്ച ഉച്ചക്ക് ശേഷം നടത്തിയ ആക്രമണം മുഹമ്മദ് സിന്‍വാറിനെ ലക്ഷ്യമിട്ടായിരുന്നുവെന്നാണ് ഐ.ഡി.എഫിന്റെ വാദം. ആശുപത്രിക്കടിയില്‍ ഹമാസ് കമാന്‍ഡ് സെന്റര്‍ സ്ഥിതി ചെയ്യുന്നുണ്ടെന്നാണ് സൈന്യം ആരോപിക്കുന്നത്.  

സിന്‍വാര്‍ കൊല്ലപ്പെട്ടോ എന്ന കാര്യത്തില്‍ ഇസ്‌റാഈലിന്റെ ഭാഗത്തു നിന്ന് സ്ഥിരീകരണം ഉണ്ടായിട്ടില്ല. എന്നാല്‍ ഇക്കാര്യത്തില്‍ പ്രതികരിച്ച ഉദ്യോഗസ്ഥര്‍ ഹമാസിന്റെ മുതിര്‍ന്ന നേതാവിനെ ഇല്ലാതാക്കുക എന്ന ലക്ഷ്യത്തോടെയാണ് ആക്രമണം നടത്തിയതെന്ന കാര്യം സ്ഥിരീകരിക്കുന്നുണ്ട്. അതേസമയം,  സിന്‍വാര്‍ യൂറോപ്യന്‍ ആശുപത്രിയില്‍ ഉണ്ടെന്നതിന് ഒരു തെളിവും ഈ നിമിഷം വരെ ഇസ്‌റാഈല്‍ പുറത്തുവിട്ടിട്ടില്ല. സിന്‍വാറിനെ കുറിച്ച് ഹമാസിന്റെ ഭാഗത്ത് നിന്നും പ്രതികരണമൊന്നും പുറത്ത് വന്നിട്ടില്ല.

ഖാന്‍ യൂനിസിലെ ആശുപത്രിയില്‍ നടത്തിയ ആക്രമണത്തിന്റെ ദൃശ്യങ്ങള്‍ ഇസ്‌റാഈല്‍ പുറത്തുവിട്ടിട്ടുണ്ട്. പ്രദേശത്ത് നിന്ന് വലിയ രീതിയില്‍ പുക ഉയരുന്നത് ദൃശ്യങ്ങളില്‍ കാണാം. ഇസ്‌റാഈല്‍ എയര്‍ഫോഴ്‌സ് യുദ്ധവിമാനമാണ് പ്രദേശത്ത് ബോബ് ഉപയോഗിച്ച് ആക്രമണം നടത്തിയത്. ആക്രമണത്തില്‍ 16 പേര്‍ മരിച്ചുവെന്നും 70 പേര്‍ക്ക് പരിക്കേറ്റുവെന്നും ഹമാസ് ആരോഗ്യമന്ത്രാലയം അറിയിച്ചിട്ടുണ്ട്. 

യുദ്ധത്തില്‍ തകര്‍ത്തെറിഞ്ഞ ഫലസ്തീന്‍ പ്രദേശത്ത് ഉപരോധം ഏര്‍പ്പെടുത്തി 10 ആഴ്ചകള്‍ പിന്നിട്ടിരിക്കുകയാണ്. ഭക്ഷണം, മരുന്ന്, പാര്‍പ്പിടം, ഇന്ധനം എന്നിവയുള്‍പ്പെടെ എല്ലാ സഹായങ്ങളുടെയും വിതരണങ്ങളും നിര്‍ത്തിവെച്ച നിലയിലാണ്. ഇസ്‌റാഈലിന്റെ കടുത്ത ഉപരോധത്തില്‍ ഗസ്സ ഗുരുതരമായ ക്ഷാമത്തിലേക്കെന്ന് കഴിഞ്ഞ ദിവസം ഭക്ഷ്യ സുരക്ഷാ ഉദ്യോഗസ്ഥര്‍ വീണ്ടും മുന്നറിയിപ്പ് നല്‍കിയിരുന്നു. 

2024 ഒക്ടോബറിലെ അവസാന വിലയിരുത്തല്‍ മുതല്‍ ഗസ്സയിലെ ഭക്ഷ്യസുരക്ഷാ സാഹചര്യത്തില്‍ വന്‍ തകര്‍ച്ച ഉണ്ടായിട്ടുണ്ടെന്നും അവിടെ താമസിക്കുന്ന ഫലസ്തീനികള്‍ ഗുരുതരമായ ക്ഷാമ സാധ്യത നേരിടുന്നുണ്ടെന്നും ഇന്റഗ്രേറ്റഡ് ഫുഡ് സെക്യൂരിറ്റി ഫേസ് ക്ലാസിഫിക്കേഷന്‍ (ഐ.പി.സി) അതിന്റെ ഏറ്റവും പുതിയ റിപ്പോര്‍ട്ടില്‍ ചൂണ്ടിക്കാട്ടുന്നു. 

The Israeli Defense Forces (IDF) claim an airstrike on the European Hospital in Khan Younis was aimed at Hamas leader Mohammad Sinwar, brother of Yahya Sinwar.