ന്യൂഡല്‍ഹി: പാകിസ്താന്‍ പിടിയിലായിരുന്ന ബി.എസ്.എഫ് ജവാന്‍ പൂര്‍ണം കുമാര്‍ ഷായെ ഇന്ത്യക്ക് കൈമാറി. അട്ടാരി അതിര്‍ത്തി വഴിയാണ് ഷായെ ഇന്ത്യന്‍ അധികൃതര്‍ക്ക് കൈമാറിയത്. 

'2025 ഏപ്രില്‍ 23 മുതല്‍ പാകിസ്ഥാന്‍ റേഞ്ചേഴ്സിന്റെ കസ്റ്റഡിയിലായിരുന്ന ബി.എസ്.എഫ് ജവാന്‍ പൂര്‍ണം കുമാര്‍ ഷായെ ഇന്ന് രാവിലെ 10.30 ഓടെ അമൃത്സറിലെ അട്ടാരി ജോയിന്റ് ചെക്ക് പോസ്റ്റ് വഴി ഇന്ത്യക്ക് കൈമാറി. കൈമാറ്റം സമാധാനപരമായും സ്ഥാപിതമായ പ്രോട്ടോക്കോളുകള്‍ അനുസരിച്ചുമാണ് നടന്നത്,' ബി.എസ്.എഫ് പുറത്തിറക്കിയ പ്രസ്താവനയില്‍ പറയുന്നു.

അബദ്ധത്തില്‍ അതിര്‍ത്തി കടന്ന് പാകിസ്ഥാന്റെ പിടിയിലായി 20 ദിവസത്തെ കസ്റ്റഡിക്ക് ശേഷമാണ് ഷാ മോചിതനാകുന്നത്. ഇന്ത്യ- പാക് സംഘര്‍ഷത്തിന് വെടിനിര്‍ത്തലിലൂടെ പരിഹാരമായിട്ടും പാക് സൈനിക കസ്റ്റഡിയിലുള്ള ബി.എസ്.എഫ് ജവാന്‍ പൂര്‍ണം കുമാര്‍ ഷാ(34)യുടെ മോചന കാര്യത്തില്‍ കാര്യമായ പുരോഗതിയൊന്നും ഉണ്ടായിരുന്നില്ല. മെയ് ഏഴിന് പാക് അധീന കശ്മിരിലും പാകിസ്ഥാനിലും ആക്രമണം നടത്തുന്നതിന് മുമ്പ് വരെ സൈനിക തലത്തില്‍ ജവാന്റെ മോചന കാര്യത്തില്‍ ചര്‍ച്ച നടത്തിയിരുന്നു. പിന്നീട് നാലുദിവസത്തോളം നീണ്ട സംഘര്‍ഷത്തിനിടെ ഇക്കാര്യത്തില്‍ യാതൊരു പുരോഗതിയും ഉണ്ടായില്ല. ഇതിനെതിര കടുത്ത വിമര്‍ശനവും ഉയര്‍ന്നിരുന്നു. 

വെടിനിര്‍ത്തല്‍ ഉണ്ടായിട്ടും തന്റെ ഭര്‍ത്താവിന്റെ മോചനം വൈകുന്നതില്‍ ആശങ്ക പ്രകടിപ്പിച്ച് ഷായുടെ ഭാര്യ രജനിയും കുടുംബവും രംഗത്തെത്തിയിരുന്നു.  തന്റെ ഭര്‍ത്താവിന്റെ കാര്യത്തില്‍ വേഗത്തിലുള്ള നടപടിയുണ്ടാവണമെന്ന് ആവശ്യപ്പെട്ട് പൂര്‍ണ ഗര്‍ഭിണിയായ രജനിയുടെ വീഡിയോയും പുറത്തു വന്നിരുന്നു. 

'ഭര്‍ത്താവിനെക്കുറിച്ചുള്ള പുതിയ വിവരങ്ങളൊന്നും കഴിഞ്ഞ കുറേ ദിവസമായി ലഭ്യമല്ല. പിടിയിലായതിന് തൊട്ടടുത്ത ദിവസം അദ്ദേഹത്തിന്റെ ഫോട്ടോ പാക് സൈന്യം പുറത്തുവിട്ടിരുന്നു. പിന്നീട് വിവരങ്ങള്‍ പങ്കുവയ്ക്കാന്‍ അവര്‍ തയാറായില്ല. ഇനി എന്ത് വാര്‍ത്ത വരുമെന്ന് എനിക്കറിയില്ല. ദിവസങ്ങള്‍ കഴിഞ്ഞിട്ടും ഭര്‍ത്താവിനെക്കുറിച്ച് ഒരു വിവരവുമില്ല. എന്റെ സിന്ദൂരം തിരികെ തരൂ, സര്‍ക്കാരേ... ' എന്നായിരുന്നു അവരുടെ വൈകാരികമായ പ്രതികരണം. 

ബി.എസ്.എഫിന്റെ  ഫിറോസ്പൂര്‍ 24ാം ബെറ്റാലിയന്‍ അംഗമായ പൂര്‍ണം കുമാര്‍ ഷാ ഏപ്രില്‍ 23നാണ് നിയന്ത്രണ രേഖ കടന്നതിനെ തുടര്‍ന്ന് പാക് പിടിയിലായത്. അതിര്‍ത്തി മേഖലയിലെ കര്‍ഷകരെ സുരക്ഷിത മേഖലയിലേക്ക് ഒഴിപ്പിക്കുന്നതിനിടെയാണ് ജവാന്‍ അബദ്ധത്തില്‍ നിയന്ത്രണ രേഖ കടന്നത്.

ക്ക് കൈമാറിയത്.