മുംബൈ:പൂനെയിൽ നിന്ന് സാംഗ്ലിയിലേക്കുള്ള തടവുപുള്ളിയുടെ മാറ്റത്തിനിടയിൽ നടന്ന നിയമലംഘനവുമായി ബന്ധപ്പെട്ട് വിവാദം. ഗുണ്ടാ നേതാവ് ഗജ മർനെ, അഥവാ 'ഗജനൻ' എന്നറിയപ്പെടുന്നയാളെ, പൊലീസ് കസ്റ്റഡിയിൽ കൊണ്ടുപോകുന്ന സമയത്ത് വാഹനമൊതുക്കി മട്ടൻ ബിരിയാണി വാങ്ങിയ സംഭവത്തിൽ അഞ്ച് പൊലീസുകാർക്കെതിരെ നടപടി എടുത്തിരിക്കുകയാണ്.

പൂനെയിലെ യെർവാദ സെൻട്രൽ ജയിലിൽ നിന്നു സാംഗ്ലി ജില്ലാ ജയിലിലേക്ക് മാറ്റുന്നതിനിടയിലാണ് സംഭവം. ഫെബ്രുവരി 19ന് ശിവജയന്തി ആഘോഷങ്ങൾക്ക് ഇടയിൽ ഒരു സോഫ്റ്റ്‌വെയർ എഞ്ചിനീയറെ മർദിച്ച കേസിൽ മക്കോക്ക നിയമപ്രകാരം അറസ്റ്റ് ചെയ്ത ഗജ മർനെയെ ജയിലിൽ തടവിലാക്കിയിരുന്നു. എന്നാൽ, ജയിലിൽ പ്രശ്നങ്ങൾ ഉണ്ടാകുമെന്ന മുന്നറിയിപ്പിന്റെ അടിസ്ഥാനത്തിൽ ഇയാളെ സാംഗ്ലിയിലേക്ക് മാറ്റാൻ തീരുമാനിക്കുകയായിരുന്നു.

ഒരു അസിസ്റ്റന്റ് ഇൻസ്പെക്ടറുടെയും നാല് കോൺസ്റ്റബിൾമാരുടെയും നേതൃത്വത്തിലായാണ് തടവുപുള്ളിയെ മാറ്റാൻ നീക്കം നടന്നത്. യാത്രക്കിടയിൽ സതാറക്കടുത്തുള്ള ഒരു ഹോട്ടലിൽ വാഹനമിറക്കി പൊലീസ് സംഘം മട്ടൻ ബിരിയാണി വാങ്ങുകയും, അത് വാഹനത്തിൽ തന്നെ കൊണ്ടുവന്ന് ഇയാൾക്ക് കൊടുക്കുകയും ചെയ്തു. ഇതിന് പുറമേ, ഗജ മർനെയുടെ അനുയായികൾ രണ്ട് ടൊയോട്ട ഫോർച്യൂണറുകളിലും ഒരു മഹീന്ദ്ര ഥാറിലുമായെത്തി, പൊലീസിന്റെ അനുമതിയോടെ തടവുപുള്ളിയെ സമീപിക്കുകയും സംസാരിച്ചു കൊണ്ടിരുന്നുവെന്ന് സിസിടിവി ദൃശ്യങ്ങളിൽ വ്യക്തമാകുന്നു.

ഈ ദൃശ്യങ്ങൾ ഹോട്ടലിന്റെ സിസിടിവി ക്യാമറയിൽ പതിഞ്ഞിരുന്നു. പിന്നീട് സോഷ്യൽ മീഡിയയിലൂടെ വ്യാപകമായി പ്രചരിച്ചതോടെ സംഭവം വിവാദമായി. തുടർന്നാണ് പൂനെ സിറ്റി പൊലീസ് കമ്മീഷണർ അമിതേഷ് കുമാർ നടപടിയെടുത്തത്. സംഭവത്തിൽ പങ്കെടുത്ത ഒരു അസിസ്റ്റന്റ് ഇൻസ്പെക്ടറും നാല് കോൺസ്റ്റബിൾമാരുമാണ് സസ്പെൻഡുചെയ്യപ്പെട്ടത്. കൂടാതെ, കസ്റ്റഡിയിലുള്ള തടവുപുള്ളിയെ പിന്തുടർന്ന് എത്തിയ അനുയായികൾക്കെതിരെയും കേസ് രജിസ്റ്റർ ചെയ്തിട്ടുണ്ട്.

സർക്കാരിന്റെ കർശന നിർദേശങ്ങൾക്കും നിയമങ്ങൾക്കുമെതിരായ ഈ നടപടി പൊലീസിന്റെ വിശ്വാസ്യതയ്ക്കും ചോദ്യചിഹ്നമായി മാറിയിരിക്കുകയാണ്.

In a shocking incident from Pune, gangster Gajanan alias Gaj Marne was served mutton biryani while in police custody during a jail transfer. The police escort halted at a hotel in Satara to provide the meal, while Marne’s followers arrived in luxury cars and interacted with him. CCTV footage of the incident went viral, prompting Pune Police Commissioner Amitesh Kumar to suspend one Assistant Inspector and four constables. A case has also been filed against the gangster’s followers.