മുംബൈ: ഇന്ത്യ-പാകിസ്താൻ സംഘർഷ സാഹചര്യങ്ങൾ അവസാനിച്ചതോടെ ഐപിഎൽ പോരാട്ടങ്ങൾ വീണ്ടും തിരിച്ചെത്തിയിരിക്കുകയാണ്. മെയ് 17നാണ് ഐപിഎൽ വീണ്ടും ആരംഭിക്കുന്നത്. കൊൽക്കത്ത നൈറ്റ് റൈഡേഴ്സും റോയൽ ചലഞ്ചേഴ്‌സ് ബെംഗളൂരുവുമാണ് ആദ്യ മത്സരത്തിൽ ഏറ്റുമുട്ടുക.

ധരംശാലയിൽ നടന്ന പഞ്ചാബ് കിംഗ്സ് - ഡൽഹി ക്യാപിറ്റൽസ് മത്സരം പാതിവഴിയിൽ ഉപേക്ഷിച്ചിരുന്നു. ജമ്മു, പത്താൻകോട്ട് എന്നിവിടങ്ങളിൽ അപായ സൈറണുകൾ മുഴങ്ങിയതിനെ തുടർന്ന് സ്റ്റേഡിയത്തിലെ വൈദ്യുതി വിച്ഛേദിക്കപ്പെട്ടിരുന്നു. തുടർന്ന് സുരക്ഷ മുൻനിർത്തി മത്സരം ഉപേക്ഷിക്കുകയായിരുന്നു. ഇതിന് പിന്നാലെയാണ് ബിസിസിഐ ഐപിഎൽ നിർത്തിവെക്കുന്നതായി അറിയിച്ചത്. 

ഇപ്പോൾ മുംബൈ ടീമിൽ ഇംഗ്ലണ്ട് ഓപ്പണർ ജോണി ബെയർസ്‌റ്റോ ഇടം നേടുമെന്നാണ് റിപ്പോർട്ടുകൾ സൂചിപ്പിക്കുന്നത്. വിൽ ജാക്‌സിന് പകരക്കാരനായിട്ടായിരിക്കും ബെയർസ്‌റ്റോ മുംബൈയിൽ എത്തുക. മുംബൈ പ്ലേ ഓഫിലേക്ക് മുന്നേറിയാൽ മാത്രമേ ഈ നീക്കം നടക്കുകയുള്ളൂ. ഗ്രൂപ്പ് ഘട്ടത്തിലെ ശേഷിക്കുന്ന രണ്ട് മത്സരങ്ങളിൽ വിൽ ജാക്സ് മുംബൈക്ക് വേണ്ടി കളിക്കും, എന്നാൽ മെയ് 29ന് ആരംഭിക്കുന്ന വെസ്റ്റ് ഇൻഡീസിനെതിരായ ഏകദിന, ടി-20 പരമ്പരക്കുള്ള ഇംഗ്ലണ്ട് ടീമിൽ ഇടം നേടിയതിനാൽ താരം ഈ സമയങ്ങളിലേക്ക് നാട്ടിലേക്ക് മടങ്ങും. ഈ സാഹചര്യത്തിലാണ് ജോണി ബെയർസ്‌റ്റോയെ ടീമിലെത്തിക്കാൻ മുംബൈ തീരുമാനിച്ചത്. 

2024 ജൂൺ മുതൽ ബെയർസ്‌റ്റോ ഇംഗ്ലണ്ടിനായി കളിച്ചിട്ടില്ല. ഐപിഎല്ലിൽ കളിച്ച മികച്ച പരിചയസമ്പത്തുള്ള താരം കൂടിയാണ് ജോണി ബെയർസ്‌റ്റോ. ഐപിഎല്ലിൽ 50 മത്സരങ്ങളിൽ നിന്നും 1589 റൺസ് ആണ് ബെയർസ്‌റ്റോ നേടിയിട്ടുള്ളത്. 34.54 ആവറേജിലും 144.46 സ്ട്രൈക്ക് റേറ്റിലും ആണ് താരം ബാറ്റ് വീശിയിട്ടുള്ളത്. വിൽ ജാക്സ് ഈ സീസണിൽ ഒമ്പത് ഇന്നിംഗ്‌സുകളിൽ നിന്നുമായി 195 റൺസാണ് നേടിയിട്ടുള്ളത്. 

നിലവിൽ ഐപിഎൽ പോയിന്റ് പട്ടികയിൽ നാലാം സ്ഥാനത്താണ് മുംബൈ ഇന്ത്യൻസ്. 12 മത്സരങ്ങളിൽ നിന്നും ഏഴ് വിജയവും അഞ്ചു തോൽവിയും അടക്കം 14 പോയിന്റാണ് മുംബൈക്കുള്ളത്. മെയ് 21ന് ഡൽഹി ക്യാപിറ്റൽസിനെതിരെയാണ് മുംബൈയുടെ അടുത്ത മത്സരം. ഇതിന് ശേഷം ഗ്രൂപ്പ് ഘട്ടത്തിലെ അവസാന മത്സരത്തിൽ  മെയ് 26ന് പഞ്ചാബ് കിങ്സിനെയും മുംബൈ നേരിടും. 

Report says Mumbai Indians will sign Jonny Bairstow In IPL 2025