ഡൽഹി: ഇന്ത്യ-പാകിസ്താൻ സംഘർഷങ്ങൾ അവസാനിച്ചതോടെ ഐപിഎൽ വീണ്ടും മടങ്ങിയെത്തിയിരിക്കുകയാണ്. മെയ് 17നാണ് ഐപിഎൽ വീണ്ടും ആരംഭിക്കുന്നത്. ഇപ്പോൾ ഐപിഎൽ വീണ്ടും തുടങ്ങാനിരിക്കെ ഡൽഹി ക്യാപ്പിറ്റൽസിന് വമ്പൻ നിരാശ നൽകുന്ന വാർത്തയാണ് പുറത്തുവന്നിരിക്കുന്നത്. പേസർ മിച്ചൽ സ്റ്റാർക്കും ഓപ്പണർ ഫാഫ് ഡു പ്ലെസിസും അവശേഷിക്കുന്ന മത്സരങ്ങളിൽ കളിക്കില്ല. 

ഇരുവർക്കും ബാക്കിയുള്ള മത്സരങ്ങൾ നഷ്ടമാവുമെന്നാണ് ഇഎസ്പിഎൻ ക്രിക് ഇൻഫോ റിപ്പോർട്ട് ചെയ്യുന്നത്. ആറ് ഇന്നിംഗ്‌സുകളിൽ നിന്നും ഡു പ്ലെസിസ് 168 റൺസാണ് നേടിയിട്ടുള്ളത്. ഇവർക്ക് പുറമെ ഡെവോണൻ ഫെറിയേര, ജെയ്ക്ക് ഫ്രേസർ മക്ഗുർക്ക് എന്നിവരും ടീമിൽ നിന്നും പിന്മാറിയിട്ടുണ്ട്. 

ധരംശാലയിൽ നടന്ന പഞ്ചാബ് കിംഗ്സ് - ഡൽഹി ക്യാപിറ്റൽസ് മത്സരം പാതിവഴിയിൽ ഉപേക്ഷിച്ചിരുന്നു. ജമ്മു, പത്താൻകോട്ട് എന്നിവിടങ്ങളിൽ അപായ സൈറണുകൾ മുഴങ്ങിയതിനെ തുടർന്ന് സ്റ്റേഡിയത്തിലെ വൈദ്യുതി വിച്ഛേദിക്കപ്പെട്ടിരുന്നു. തുടർന്ന് സുരക്ഷ മുൻനിർത്തി മത്സരം ഉപേക്ഷിക്കുകയായിരുന്നു. 

നിലവിൽ പോയിന്റ് പട്ടികയിൽ 13 പോയിന്റുമായി ഡൽഹി അഞ്ചാം സ്ഥാനത്താണ് ഉള്ളത്. പ്ലേ ഓഫ് യോഗ്യത ഉറപ്പിക്കാൻ ഡൽഹിക്ക് ഇനിയുള്ള മത്സരങ്ങളിൽ വിജയം അത്യാവശ്യമാണ്. ഗുജറാത്ത് ടൈറ്റൻസ്, പഞ്ചാബ് കിങ്‌സ്, മുംബൈ ഇന്ത്യൻസ് എന്നീ ടീമുകൾക്കെതിരെയാണ് ഇനി ഡൽഹിയുടെ മത്സരങ്ങൾ. ഈ മൂന്ന് മത്സരങ്ങളും ക്യാപ്പിറ്റൽസിന്‌ അതിനിർണായകമാണ്. 

As the IPL is about to resume, there is disappointing news for Delhi Capitals: Pacer Mitchell Starc and opener Faf du Plessis will not play in the remaining matches.